Тәйвән тәкшүрүш идарисиниң икки хадими хитайға мәлумат сатқанлиқи үчүн қолға елинди


2007.09.24
Share on WhatsApp
Share on WhatsApp

Тәйвән һөкүмәт хадиминиң билдүрүшичә, тәйвән сақчи даирилири, тәйвән әдлийә министирлиқи тәкшүрүш идариси( BOI) ниң җасуслуққа қарши хизмәт қилидиған бир нәпәр хадимини хитайға ишләп бәрди, дәп әйибләп қолға алған.

Бирләшмә агентлиқи бу һәқтә бәргән хәвәрдә, тәйвән әдлийә министирлиқи тәкшүрүш идариси( BOI) ниң хадими ху җуңминниң ейтқанлирини нәқил кәлтүрүшичә, тәкшүрүш идарисиниң хадими лин йүноң, 23- чесла йәкшәнбә күни тәйбей шәһиридики бир меһманханида, пул үчүн хитай җасуслирини мәлумат билән тәминлигән дәп әйиблинип қолға елинған вә шу күни сақчиға елип кетилгән.

Тәйвән тәкшүрүш идарисидики ху фамилилик бу хадимниң тәйвән мухбирлириға билдүргәнлиригә қариғанда, лин билән йәнә бир нәпәр сабиқ җасуслуққа қарши туруш хизмити ишлигән хадим: чен чикавму қолға елинған.

Тәйвән әдлийә министирлиқи тәкшүрүш идариси болса хитай җасуслуқ һәрикәтлириниң изиға чүшүп тәкшүрүш елип баридиған җасуслуққа қарши орган болуп, тәйвән ахбарат тармақлири бәргән хәвәрләргә қариғанда, чен 1997- йили мәзкур идаридин қол үзгәндин кийин хитайниң шаңхәй шәһиригә берип бир нәшриятчилиқ ширкити ачқан вә 2005- йили лин йүноңни хитайға ишләшкә көндүргән.

Тәйвән әдлийә министирлиқи тәкшүрүш идариси( BOI) дики ху җуңминниң билдүрүшичә, лин йүноң вә чен чикав хитай тәрәпни муһим мәлуматлар билән тәмин етип турған болуп, һазирға кәлгүчә 4 қетим алмаштуруш елип барған. Хитай җасуслуқ органлири дуня буйичә әң актип һәрикәт елип бериватқан органларниң бири болуп, мәлум болушичә, бу йил америка тәрәп хитайниң 3000 нәпәр ишпийониниң америкида һәрикәт қиливатқанлиқини ашкарилиған. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.