Teywen tekshürüsh idarisining ikki xadimi xitaygha melumat satqanliqi üchün qolgha élindi

Teywen hökümet xadimining bildürüshiche, teywen saqchi da'iriliri, teywen edliye ministirliqi tekshürüsh idarisi( BOI) ning jasusluqqa qarshi xizmet qilidighan bir neper xadimini xitaygha ishlep berdi, dep eyiblep qolgha alghan.

Birleshme agéntliqi bu heqte bergen xewerde, teywen edliye ministirliqi tekshürüsh idarisi( BOI) ning xadimi xu jungminning éytqanlirini neqil keltürüshiche, tekshürüsh idarisining xadimi lin yünong, 23- chésla yekshenbe küni teybéy shehiridiki bir méhmanxanida, pul üchün xitay jasuslirini melumat bilen teminligen dep eyiblinip qolgha élin'ghan we shu küni saqchigha élip kétilgen.

Teywen tekshürüsh idarisidiki xu famililik bu xadimning teywen muxbirlirigha bildürgenlirige qarighanda, lin bilen yene bir neper sabiq jasusluqqa qarshi turush xizmiti ishligen xadim: chén chikawmu qolgha élin'ghan.

Teywen edliye ministirliqi tekshürüsh idarisi bolsa xitay jasusluq heriketlirining izigha chüshüp tekshürüsh élip baridighan jasusluqqa qarshi organ bolup, teywen axbarat tarmaqliri bergen xewerlerge qarighanda, chén 1997- yili mezkur idaridin qol üzgendin kiyin xitayning shangxey shehirige bérip bir neshriyatchiliq shirkiti achqan we 2005- yili lin yünongni xitaygha ishleshke köndürgen.

Teywen edliye ministirliqi tekshürüsh idarisi( BOI) diki xu jungminning bildürüshiche, lin yünong we chén chikaw xitay terepni muhim melumatlar bilen temin étip turghan bolup, hazirgha kelgüche 4 qétim almashturush élip barghan. Xitay jasusluq organliri dunya buyiche eng aktip heriket élip bériwatqan organlarning biri bolup, melum bolushiche, bu yil amérika terep xitayning 3000 neper ishpiyonining amérikida heriket qiliwatqanliqini ashkarilighan. (Jüme)