Америка дөләт мәҗлиси әзалириниң тәйвәнни қоллаш һәрикити


2007.11.10
Share on WhatsApp
Share on WhatsApp

Америка дөләт мәҗлиси авам палатасиниң 19 әзаси, дөләт мәҗлисигә тәйвәнниң б д т ға әза болуш һәрикитини қоллаш һәққидә бир қанун лайиһиси сунған.

Пәйшәнбә күни, америка дөләт мәҗлисиниң 18 җумһурийәтчи партийиси вә бир демократ партийиси әза тәрипидин, америка дөләт мәҗлиси ташқи ишлар комитетиға сунулған қанун лайиһисидә, "тәйвән вә униң 23 милйон аһалисиниң б д т ға әза болуш һоқуқи бар. Шуңа америка һөкүмити тәйвәнниң мунасивәтлик хәлқаралиқ тәшкилатларға әза болуш һәрикитини қоллаш арқилиқ, өзиниң вәзиписини орундиши керәк" дейилгән.

Тәйвән һөкүмити, америка дөләт мәҗлиси әзалири тәрипидин сунулған қанун лайиһисини қизғин қарши алидиғанлиқини тәкитләп, президент буш һөкүмитиниң тәйвәнгә қаратқан сияситидә, дөләт мәҗлиси әзалириниң тәләплирини диққәткә елишини үмид қилидиғанлиқини билдүрди. Сиясий мулаһизичиләр, америка дөләт мәҗлиси әзалириниң бу тәшәббуси хитай һөкүмитини техиму биарам қилиши мумкин, дейишмәктә.

Көпчиликкә мәлум болғандәк, президент буш һөкүмити, тәйвән президенти чин шүйбийәнниң, тәйвәндә келәр йили өткүзүлмәкчи болған президент сайлими билән бирликтә, тәйвәнниң б д т ға әза болуши мәсилсидә хәлқ райини синаш елип бериш қарариға қарши чиқмақта.

Хитай һөкүмити, чин шүйбийәнниң бу қарарини тәйвәнниң мустәқиллиқи йолида ташланған йеңи бир қәдәм дәп қаримақта. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.