Тәйвән б д т ға әза болуш рефирандуминиң өз вақтида елип берилидиғанлиқини җакарлиди

Тәйвән мәркизи сайлам комитети җүмә күни тәйвәндә 3 ‏- айниң 22 ‏- күни президент сайлими елип берилиш билән тәң, шу күни йәнә тәйвәнниң б д т ға әза болуш илтимаси омуми хәлқ авазиға қоюлидиғанлиқини елан қилди. Сайлам күни тәйвән хәлқи җуңхуа минго дегән намни бикар қилип," тәйвән нами астида б д т ға қатнишиш- қатнашмаслиқ " ни қарар қилиду.

Бу тәклип лайиһисини тәйвәндә һакимийәт бешидики демократийә илғарлиқ партийиси оттуриға қойған болуп, мәзкур партийә өткән айдики парламент сайлимида еғир мәғлубийәткә учриғандин кейин, тәйвән нами астида б д т ға қатнишиш тәклипини хәлқ авазиға қоюш яки қоймаслиқ мәсилиси талаш- тартиш қозғиған.

Лекин гоминдаң партийиси " җуңхуа минго, дегән нам астида яки әмәлийәтни чиқиш қилған шундақла ғәлибә қилғили болидиған бир исим билән б д т ға қайтиш" тәклипини оттуриға қоюп, буни омуми хәлқниң авазиға қоюшни тәшәббус қилмақта. Демократийә илғарлиқ партийиси оттуриға қойған тәклип лайиһисидә болса б д т ға "кириш" тәкитләнгән. Әмма гоминдаңниң тәклип лайиһисидә б д т ға қайтиш тәкитләнмәктә.

Демократийә илғарлиқ партийисиниң тәклип лайиһиси бейҗиң һөкүмити вә америкиниң қарши турушиға учриди. Америка ташқи ишлар министири кондализа райис, чен шүйбйән һөкүмитиниң һәрикитини " иғвагәрчилик", дәп әйиблигән. Лекин президент чен шүйбйән рефирандумни ақлап, " бу һәргиз иғвагәрчилик әмәс, бәлки тәйвән хәлқиниң ирадисигә һүрмәт қилиш " дегән иди. Тәйвән мәркизи сайлам комитети рефирандум қарарини җакарлаш билән биргә йәнә, биләт ташлаш тәртипи вә қаидилирини елан қилди. (Әркин)