Teywen b d t gha eza bolush réfirandumining öz waqtida élip bérilidighanliqini jakarlidi

Teywen merkizi saylam komitéti jüme küni teywende 3 ‏- ayning 22 ‏- küni prézidént saylimi élip bérilish bilen teng, shu küni yene teywenning b d t gha eza bolush iltimasi omumi xelq awazigha qoyulidighanliqini élan qildi. Saylam küni teywen xelqi jungxu'a min'go dégen namni bikar qilip," teywen nami astida b d t gha qatnishish- qatnashmasliq " ni qarar qilidu.

Bu teklip layihisini teywende hakimiyet béshidiki démokratiye ilgharliq partiyisi otturigha qoyghan bolup, mezkur partiye ötken aydiki parlamént saylimida éghir meghlubiyetke uchrighandin kéyin, teywen nami astida b d t gha qatnishish teklipini xelq awazigha qoyush yaki qoymasliq mesilisi talash- tartish qozghighan.

Lékin gomindang partiyisi " jungxu'a min'go, dégen nam astida yaki emeliyetni chiqish qilghan shundaqla ghelibe qilghili bolidighan bir isim bilen b d t gha qaytish" teklipini otturigha qoyup, buni omumi xelqning awazigha qoyushni teshebbus qilmaqta. Démokratiye ilgharliq partiyisi otturigha qoyghan teklip layihiside bolsa b d t gha "kirish" tekitlen'gen. Emma gomindangning teklip layihiside b d t gha qaytish tekitlenmekte.

Démokratiye ilgharliq partiyisining teklip layihisi béyjing hökümiti we amérikining qarshi turushigha uchridi. Amérika tashqi ishlar ministiri kondaliza rayis, chén shüybyen hökümitining herikitini " ighwagerchilik", dep eyibligen. Lékin prézidént chén shüybyen réfirandumni aqlap, " bu hergiz ighwagerchilik emes, belki teywen xelqining iradisige hürmet qilish " dégen idi. Teywen merkizi saylam komitéti réfirandum qararini jakarlash bilen birge yene, bilet tashlash tertipi we qa'idilirini élan qildi. (Erkin)