Тәйвәндики сайламда ма йиңҗю 58 пирсәнт авазға еришип президент болди


2008.03.24

Тәйвәндә 22 - март елип берилған президент сайлимида һакимийәт бешидики партийә тәйвән демократийә вә илгириләш партийиси мәғлубийәткә учриған болуп, нәтиҗидә гоминдаң партийисиниң рәиси ма йиңҗю президент болуп сайланған иди.

Мәлум болушичә, ма йиңҗю оттуриға қойған хитай билән иқтисади мунасивәтни яхшилаш вә хитай билән тәйвән арисида бивастә қатнайдиған һава йоли тәсис қилиш идийилири көпинчә тәйвәнликниң көңлигә яққан болуп, бу нөвәтлик сайламда ма йиңҗю 58 пирсәнт авазға еришип президентлиқ орниға еришкән.

22 - Март тәйвәндә елип берилған сайламға хитай вә америка һөкүмәтлири һәр иккилисила инкас қайтурған болуп, америка авази радиосиниң нәқил елишичә, америка президенти җорҗ буш мәзкур сайлам һәққидә тохтилип, сайламниң тәйвән вә хитай мунасивәтлирини "йеңи башлиниш пурсити" билән тәмин етидиғанлиқини оттуриға қойған.

Әмма, хитай һөкүмәт игидарчилиқидики ахбарат вастилири, тәйвәндә бу нөвәтлик президент сайлими билән бирликтә елип берилған б д т ға әза болуп кириш рай синаш һәрикитиниң нәтиҗисиз болуп чиққанлиқи, тәйвән хәлқиниң мустәқиллиқни қоллимайдиғанлиқи һәққидә хәвәр бәргән.

Америка авази радиосиниң көрситишичә йәнә, ма йиңҗю тәйбей шәһиридики гоминдаң партийиси баш шитабиниң алдида, өз қоллиғучилириға тәйвән боғузиға техиму күчлүк бихәтәрлик вә иқтисади гүллиниш елип келиш үчүн тиришидиғанлиқини билдүргән. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.