Xitay, tyen'enmén weqeside maw zédongning resimige siya chachqan kishini qoyup berdi

Maw zédongning her xil rengler bilen boyalghan resimi. 1989-Yili 23-may küni tyen'enmin meydani. AFP

Xitay hökümiti 1989‏- yilidiki tyen'enmén oqughuchilar herikitide maw zédongning resimige siya qutisini atqanliqi sewebidin türmige tashlan'ghan siyasiy mehbus yü dungyüéni charshenbe küni qoyup berdi. Yüning a'ilisidikiler uning, xitay re'isi xu jintawning yéqinda amérikini ziyaret qilidighanliqi sewebidin qoyup bérilgenlikini bildürgen.

Roytérs agéntliqining xewer qilishiche, xitay hökümiti hetta yüning a'ilisidikilergimu uning qoyup bérilidighanliqini aldin xewer qilmighan. Bu yil 38 yashqa kirgen yü dongyüé 16 yildin oshuq waqit türmide yatqan. Shundaqla u türmide éghir qiyin-qistaqqa uchrighachqa, hazir uning nérwisi binormallashqan hemde tepekkür iqtidari aran 3-4 yashliq balilarningkidek iken. Yüning a'ilisidikiler hazir uning salametlikining eslige kélishini ümid qilmaqta.

Xitaydiki siyasiy mehbuslarning qoyup bérilishige köp küch chiqirip kelgen amérikining "di'alog fondi jem'iyiti" yü dongyüéning xitay hökümiti teripidin qoyup bérilgen tyen'enmén weqesidiki muhim zatlarning biri ikenlikini bildürdi.

Hazirghiche xitay hökümiti tyen'enmén weqesige chétishliqi bolghan 70 nechche neper siyasiy mehbusni türmide tutup turmaqta. (Peride)