Хитай америкиниң тйәнәнмен вәқәсигә арилашмаслиқини тәкитлиди

Хитай һөкүмити чаршәнбә күни америкиниң тйәнәнмен вәқәсигә қайта баһа бериш тоғрисидики чақириқини рәт қилип, буни хитайниң ички ишиға арилашқанлиқ дәп әйиблиди.

Америка бирләшмә агентлиқиниң хәвәр қилишичә, хитай ташқи ишлар министирлиқиниң баянатчиси лю җйәнчав " америкиниң бу ипадиси, хитайни ассассиз әйибләш вә хитайниң ички ишиға қопаллиқчә арилашқанлиқ" деди. Шундақла у йәнә, тийәнәнмен оқуғучилар вәқәсини "сиясий қалаймиқанчилиқ" дәп сүпәтләп, хитайниң бу вәқә һәққидә аллиқачан очуқ йәкүн чиқирип болғанлиқини билдүрди. У сөзидә йәнә хитайдики барлиқ пуқраларниң кишилик һоқуқ вә әркинликтин толуқ бәһримән болуватқанлиқини әскәртти.

4‏-Ийон күни тйәнәнмен вәқәсиниң 17 йиллиқи мунасивити билән америка һөкүмити баянат елан қилип, хитайни бу вәқәдә зиянкәшликикә учриғанларниң ениқ санлиқ мәлуматини беришкә чақирған иди. Америка ташқи ишлар министирлиқиниң баянатчиси шйон макормак бу һәқтә, " буниңдин 17 йил бурун, хитай һөкүмити өз хәлқи тәрипидин елип берилған тинч йолдики демократик һәрикәтни қанлиқ бастурған. Америка һөкүмити хитайниң бу вәқәдә өлгән, яриланған вә йоқап кәткәнләрниң толуқ санлиқ мәлуматини беришини күчлүк тәләп қилиду" дегән.

1989‏- Йили 4‏- ийон күни хитай һөкүмити тйәнәнмендә елип берилған оқуғучилар һәрикитини қанлиқ бастуруп, қолида қоралниң суниқиму болмиған нәччә йүзлигән һәтта нәччә миңлиған кишиниң өлүшини кәлтүрүп чиқарған иди. (Пәридә)