Тйәнәнмен анилири очуқ хәт йезип 4- июн вәқәсиниң һәқиқи маһийитини ечип беришни мураҗиәт қилди

Хитайниң мәмликәтлик хәлқ қурултийи вә мәмликәтлик сиясий кеңәш йиғини ечилиш һарписида, 1989 йили 4- июн тйәнәнмен вәқәсидә завал тапқанларниң аилә- тавабиатлири бу вәқәниң һәқиқи маһийитини ечип бериш һәққидә мураҗиәт намә йоллиди.

Мулаһизичиләрниң қаришичә, 4- июн вәқәсини қандақ бир тәрәп қилиш хитайниң демократийә дәриҗисини өлчәйдиған бир амил болуп, хитай сиясити техи у дәриҗидә әркин әмәс икән.

4-Июн вәқәсидә зиянкәшликкә учриғучиларниң аилә тавабиатлири болған "тйәнәнмен анилири" тәшкилати, хитайниң хәлқ қурултийи вә мәмликәтлик сияси кеңишгә, хитай рәиси ху җинтав, хитай баш министири вен җябав вә бейҗиңдики рәһбәрләргә очуқ хәт йоллап, уларни бу вәқәниң һәқиқи маһийитини ашкарилашқа қистиди.

1989 Йили апрелда, демократийини яқлайдиған илғар зиялийлар вә алий мәктәп оқуғучилири бейҗиңдики тйәнәнмен мәйданиға йиғилип хитайдин сөз-пикир әркинлики вә сиясий әркинлик тәләп қилип намайиш қилған вә ачлиқ елан қилған иди. Әмма, хитай рәһбәрлири һәрбий һаләт йүргүзүп нурғунлиған бигунаһ адәмләрни вә оқуғучиларни етип өлтүргән. (Җүмә)