Хитай җәнубий африқиға екиспорт қилидиған тоқумичилиқ мәһсулатлирини қисқартидиғанлиқини билдүрди

Хитай җәнубий африқиға екиспорт қилидиған тоқумичилиқ мәһсулатлирини қисқартидиғанлиқини билдүрди. Хитай баш министири вен җябав чаршәнбә күни , африқа дөләтлиридә елип барған зиярритиниң ахирқи бекити кеп тавн шәһиридә бу қарарни елан қилди.

Америка бирләшмә агентлиқи вен җябавниң мухбирларға қилған сөзини нәқил кәлтүрүп": җуңго , җәнубий африқиниң тоқумичилиқ базириниң муқимлиқи үчүн , мушу хил йолни таллашқа рази " деди.

Җәнубий африқа ишчилар уюшмиси , хитайниң әрзан баһалиқ кейим - кечәклириниң көплики сәвәбидин , җәнубий африқиниң тоқумчилиқ саһәси касатлишип, көплигән ишчиларниң ишсизлиқиға дуч кәлгәнликини билдүрмәктә. Җәнубий африқа призиденти мукибий хәлқниң бесими астида хитай тәрәпкә, сода тәңпуңсизлиқи мәсилисини оттуриға қоюшқа мәҗбур болған.

Хәвәрләргә қариғанда, өткән 10 йил ичидә җәнубий африқиниң тоқумичилиқ кәспи бойичә ишсз қалған ишчилар сани 100 миңға йәткән.

Вен җябав пәйшәнбә күни, җәнубий африқиниң сода рәһбәрлири билән учрашқандин сирт, җәнубий африқа билән хәлиқ игилики ядро техникиси қатарлиқ түрләр бойичиму келишим түзәйдикән. Җәнубий африқа хитайниң африқа қитәсидики әң чоң сода шерики һесаблиниду.

Вен җябав, бу қетим африқа қитәсидә елип барған зияритидә мисир , гана , конго вә ангола қатарлиқ дөләрләрни зиярәт қилди. (Әқидә)