Gu'angdungda saqchilar bilen yerlikler arisida tuqunush yüz berdi

Gu'angdung ölkisining shenwéy shehirige qarashliq bir yézisidiki yerlik déhqanlar bilen saqchilar arisida qanliq toqunush yüz berdi. Xongkong "quyash géziti" ning xewiridin melum bolishiche, toqunush yerlik déhqanlarning hökümet emeldarlirining térilghu yerlirini qayturuwélish siyasetlirige narazi bolghanliqi sewebidin kélip chiqqan.

Gu'angdung jung shiyuyüen yézidisiki déhqanlar hökümet da'irilirining töt yil awal intayin az tölem puli bilen térilghu yerlirini tartiwalghanliqigha narazi bolghan hemde yéziliq hökümet emeldarlirining ularning pullirigha xiyanet qilghanliqidin gumanlan'ghan. Bu sewebtin ular köp qétim alaqidar tarmaqlargha erz sun'ghan we qarshiliq namayishlirini élip barghan bolsimu, biraq mesilisi hel bolmighan. Nurghun erz sun'ghan déhqanlar hetta saqchilar teripidin tutup kétilgen.

Yekshenbe küni etigende 20 nechche saqchi yézigha kélip déhqanlarni erz sunushqa teshkilligen ikki kishini tutmaqchi bolghinida, nechche yüz déhqanlar ularni qorshawgha alghan. Bu arida saqchi mashinisi qorshawni yérip chiqmaqchi bolup, bir nechche déhqanni soqiwetken. Ghezeplen'gen déhqanlar saqchilar bilen 20 nechche sa'ettek toqunushqan. Netijide, shenwéy sheherlik hökümet da'iriliri adem ewetip, déhqanlar bilen söhbet ötküzgen hemde déhqanlarning yerlik parixor emeldarlarning mesilisini tekshürüsh, ilgiri qolgha élin'ghan alte déhqanni qoyup bérish,weqede yarilan'ghanlarning dawalinish heqqini tölesh qatarliq teleplirige qoshulghan. (Arzu)