Гуаңдуңда 50 миң киши сақчилар билән тоқунушти

Хитайниң гуаңдуң өлкисидики бир кәнттә шәнбә күни деһқанлар билән сақчилар қаттиқ тоқунушуп, вәқәдә аз дегәндә бир адәм өлгән вә нурғун адәм яриланди.

Хоңкоң мәтбуатлири вәқәниң йүз бериш сәвәби һәққидә һәр хил қарашларни оттуриға қоймақта. Хоңкоң миңбав гезитиниң билдүришичә, вәқә сақчиларниң зомигәрлики сәвәбидин келип чиққан. Дуңгүән шәһири да лияң кәнтидики бир оқуғучи қатнаш вәқәсигә учриғандин кийин, униң бир әр туққини дәвалишиш җәрянида сақчилар тәрипидин тутулуп, уруп өлтүрүлгән.

Буниңдин қаттиқ ғәзәпләнгән юртдашлири, туғқанлири вә сақчиларниң зомигәрликидин тойған көчмән ишчилардин болуп җәмий 50 миңдин артуқ киши шәнбә күни йәрлик сақчи идарисиниң алдиға берип, төттәк сақчи машинисиға от қоюп көйдүрүвәткән. Йәрлик һөкүмәт нәччә йүзлигән сақчиларни әвәтип, тоқунушни бесиқтурған һәмдә 10 дәк адәмни қолға алған.

Хоңкоңдики алма гезити болса, вәқәниң сақчилар велисипит оғрилиған бир оқуғучини уруп өлтүрүшидин келип чиққанлиқини билдүргән. Хитай даирилири бу вәқә һәққидә мәлумат беришни рәт қилмақта.

Хитайниң йезилирида һәр хил зораванлиқ топилаң вә тоқунушлар көп йүз бериватқан болуп, бир қисим анализчилар, буниң, кишиләрниң һөкүмәт әмәлдарлириниң чириклики вә һоқуқини қалаймиқан ишлитишигә қарши наразилиқ кәйпиятлириниң күчийишидин келип чиқиватқанлиқини көрсәтмәктә. (Арзу)