Gu'angdungda 50 ming kishi saqchilar bilen toqunushti

Xitayning gu'angdung ölkisidiki bir kentte shenbe küni déhqanlar bilen saqchilar qattiq toqunushup, weqede az dégende bir adem ölgen we nurghun adem yarilandi.

Xongkong metbu'atliri weqening yüz bérish sewebi heqqide her xil qarashlarni otturigha qoymaqta. Xongkong mingbaw gézitining bildürishiche, weqe saqchilarning zomigerliki sewebidin kélip chiqqan. Dunggüen shehiri da liyang kentidiki bir oqughuchi qatnash weqesige uchrighandin kiyin, uning bir er tuqqini dewalishish jeryanida saqchilar teripidin tutulup, urup öltürülgen.

Buningdin qattiq ghezeplen'gen yurtdashliri, tughqanliri we saqchilarning zomigerlikidin toyghan köchmen ishchilardin bolup jem'iy 50 mingdin artuq kishi shenbe küni yerlik saqchi idarisining aldigha bérip, töttek saqchi mashinisigha ot qoyup köydürüwetken. Yerlik hökümet nechche yüzligen saqchilarni ewetip, toqunushni bésiqturghan hemde 10 dek ademni qolgha alghan.

Xongkongdiki alma géziti bolsa, weqening saqchilar wélisipit oghrilighan bir oqughuchini urup öltürüshidin kélip chiqqanliqini bildürgen. Xitay da'iriliri bu weqe heqqide melumat bérishni ret qilmaqta.

Xitayning yézilirida her xil zorawanliq topilang we toqunushlar köp yüz bériwatqan bolup, bir qisim analizchilar, buning, kishilerning hökümet emeldarlirining chirikliki we hoquqini qalaymiqan ishlitishige qarshi naraziliq keypiyatlirining küchiyishidin kélip chiqiwatqanliqini körsetmekte. (Arzu)