Jéjyangdiki qanliq topilangdin kéyinki weziyet dawamliq jiddi bolmaqta


2005.04.13

Yekshenbe küni xitayning jéjyang ölkiside yüz bergen déhqanlar bilen xitay saqchiliri otturisidiki toqunushtin kéyin, déhqanlarning naraziliqi dawamliq ashmaqta.

Topilang yüz bergen jéjyangning dongyang shehirige qarashliq xu'ashi yézisidiki bir déhqan fransiye agéntliqigha, topilangdin kéyin bu yézigha birmu saqchining kélip baqmighanliqini éytip, saqchilarning bu yerge kélishtin qorqqanliqini bildürdi.

Topilang déhqanlar uzun yillardin buyan narazi bolup kelgen bir zawut sewebidin kélip chiqqan bolup, déhqanlar hökümet échishqa ruxset qilghan bu zawuttin chiqqan kéreksiz maddilarning muhitqa we salametlikke ziyanliq ikenlikini bolupmu buning mezkur yézidiki déhqanlarning su menbesige quyulghachqa, ularning salametlikige éghir tehdit boliwatqanliqini tekitligen.

Emma déhqanlarning bu naraziliqigha héchkim qulaq salmighachqa, ular zawut etraplirigha kepilerni sélip, zawutning ishlepchiqirishini tosushni meqset qilghan. Kéyin 300 din oshuq xitay saqchisi bu rayon'gha kélip kepilerni örüshke bashlighanda, bu yézidiki déhqanlar hemmisi kötürülüp chiqip saqchilargha tash we pichaqlar bilen hujum qilghan hemde bu toqunushta xitay saqchiliri we hökümet emeldarliridin bolup 80 ge yéqin kishi yarilan'ghan. Xewerde melum bolushiche, buninggha qatnashqan déhqanlarning sani 10 mingdin éship ketken.

Bu yézidiki bir déhqan yene mezkur agéntliqqa, déhqanlarning nöwette zawutning qayta ish bashlishining aldini élish üchün hazirmu dawamliq bu zawutni qorshap turiwatqanliqini, shundaqla ularning taki eng axirqi ümid tügigiche mushundaq qilidighanliqini bildürgen. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.