Gu'angdongda déhqanlar bilen saqchilar toqunushup qaldi

Gu'angdong ölkiside shenbe küni, yerge bérilgen tölem mesilisi sewebidin déhqanlar bilen saqchilar arisida toqunush yüz bérip, nechche kishi yarilandi.

Roytérs agéntliqining xewirige qarighanda, gu'angdongning jungshen shehirige qarashliq senjyaw kentidiki nechche yüz déhqan shenbe küni hökümetning ularning yerlirige bergen tölem sommisigha narazi bolup namayish ötküzgen. Netijide yüzge yéqin saqchi namayishchilarni qoghlighanda, narazi bolghan xelq, saqchilar bilen éytiship qalghan. Ismini ashkarilashni xalimighan bir kishi agéntliqqa, nurghun kishining yarilan'ghanliqini hemde nurghunlirining saqchilar teripidin élip kétilgenlikini éytqan.

Xewerde körsitilishiche, bu namayishchilar ötken hepte yéziliq hökümet aldigha bérip, tinch olturup namayish qilghan. Emma hökümet da'iriliri ularning naraziliqigha inkas qayturmighandin kéyin, andin ular shenbe küni bu yerdiki chong qatnash kochilirigha chiqip namayish qilghan. Lékin hazirghiche xitay da'iriliri bu toqunush toghrisida héchqandaq inkas qayturmidi.

Xitayning gu'angdong ölkiside ötken aymu mushuninggha oxshash saqchilar bilen namayishchilar otturisida toqunush yüz bergen bolup, u chaghda saqchilar namayishchilarni qoralliq basturup az dégende 20 kishini étip tashlighan idi.(Peride)