Güyyangda nechche yüz kishi topilang kötürüp saqchilar bilen toqunushti

Guyjuning güyyang shehiridiki nechche yüz kishi saqchilarning bir kishini urghanliqigha narazi bolup topilang kötürgen hemde saqchi mashinilirini urup chaqqan.

Fransiye axbarat agéntliqining melum qilishiche, topilang düshenbe küni yüz bergen bolup, bu saqchilarning güyyangda waqitliq turush resmiyitini béjirmigen bir kishini urghanliqi sewebidin kélip chiqqan. Topilanggha 300 dek kishi qatnashqan hemde ularning köpünchisi déhqanlar we köchmen ishchilar iken.

Saqchi da'iriliri topilangni bésiqturush üchün saqchi qisimlirini chiqarghan. Shundaqla ikki terep otturisidiki toqunushta bir qisim kishiler saqchilar teripidin urup yarilandurulghan hemde nechchisi qolgha élin'ghan.

Xewerde melum bolishiche, ghezeplen'gen bir qisim kishiler saqchilarning pulning koyigha chüshüp ketkenlikini waqitliq turush resmiyetlirini chingitish we béjirish sommilirini östüriwélish arqiliq köchmen ishchilargha qesten awarichiliq tughduriwatqanliqini eyiblidi.

Xitayda yéqinqi yillardin buyan mushuninggha oxshash xelq arisidiki naraziliq namayishliri köp körülgen bolup, ötken bir yilning ichidila xitayda 87000 qétim xelq qarshiliq herikiti yüz bergen. (Peride)