Хәйнәндә кәнт аһалилири билән сақчилар оттурисида тоқунуш йүз бәрди


2006.07.16
Share on WhatsApp
Share on WhatsApp

Хитайниң хәйнән өлкисиниң фәнкәй йезисидики йүзгә йеқин киши сақчилар билән тоқунушуп, сақчи вә йеза аһалилиридин болуп аз дегәндә 60 қа йеқин киши яриланған. Шундақла сақчилар 40 тәк кишини қолға алған.

Франсийә агентлиқиниң мәлум қилишичә, бу йезидики аһалиләр аз санлиқ милләтләр болуп, улар 7‏-айниң 4 ‏-күни сирттин кәлгән бир такси шопурини уларниң диний мурасимини бузған дәп әйибләп, униң машинисини тартивалған. Такси шопуриниң сақчи даирлириға хәвәр қилиши билән, дәнҗов шәһәрлик сақчи орунлири қораллиқ бир түркүм сақчини фәнкәй йезисиға әвәткән.

Йеза аһалиси қоллирида пичақ, тохмақ вә чалма-кесәкләрни елип сақчилар билән тутушқан. Һәр иккила тәрәптин болуп, 60 қа йеқин киши яриланған. Дәнҗов шәһәрлик җамаәт хәвпсизлик идариси сақчиларға мәзкур йезидики қалаймиқанчилиқни дәрһал бесиқтурушни буйриған. Нәтиҗидә сақчи даирилири 40 нәччә кишини қолға алған. Буларниң тәңдин толиси аяллар икән.

12‏- Ийол күни сақчилар йәнә бу һәрикәткә четишлиқи болған ахирқи бир түркүмдики 17 кишини қолға алған. Адәттә хитайда сақчиға һуҗум қилғучиларға қаттиқ җаза қоллиниду. Хитайда мушу хилдики хәлқниң қаршилиқ һәрикәтлири йеқинқи йиллардин буян бир қәдәр көп көриливатқан болуп,хитай даирилириниң статистикисиға қариғанда, өткән бир йил ичидила хитайда хәлқ наразилиқ һәрикәтлиридин 87 миң қетим йүз бәргән. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.