Xitayda herbiydin chékin'gen eskerler bilen saqchilar otturisida qanliq toqunush yüz berdi

Royétirs agéntliqi seyshenbe küni xongkongdiki xitay kishilik hoquq démokratiye uchur merkizining sözini neqil keltürüp, ötken hepte ichki mongghulning bawto, shenshi ölkisining bawji we xubéy ölkisining wuxen qatarliq jaylirida, tömür yol mektipide chiniqiwatqan herbiyliktin chékin'gen 2 ming esker bilen nechche minglighan saqchi otturisida qanliq toqunush yüz bergenlikini bildürdi.

Xewerdin melum bolushiche, toqunushta 20 nechche adem yarilan'ghan, 5 adem qolgha élin'ghan bolup , xitay tömür yol ministirliqi bu yil 7 ‏- ayda bir tutash imtihan tesis qilip, herbiyliktin chékin'gen 6 ming eskerni , tömür yol tarmiqining 12 mektipide 2 yilgha qeder chéniqturushni qarar qilghan.

Eskerliktin qaytqan 6 ming kishi mektepning turmush we öginish shara'itlirining nacharliqidin narazi bolup topilang chiqarghan. Fransiye agéntliqining bu heqte bergen xewirige qarighanda, bawto tömür yol mektipining bir oqughuchisi fransiye agéntliqining muxbirigha yüz bergen topilang herikiti heqqide sözlep, mekteptiki pütün sinip , ishxanilarning ishik ‏- derizilirining urup chéqiwitilgenlikini hetta mektep aptomobilliriningmu weyran qilin'ghanliqini bildürgen. Emma bu oqughuchi mektepke ot qoyuwétilgenlik toghrisidiki paranglarni inkar qilip, nöwette mektepning ténch haletke qaytqanliqini éytqan.

Topilang , tömür yol ministirliqigha tewe üch jaydiki 12 mektepte birla waqitta teng yüz bergen bolup, weqedin xewerdar kishilerning bildürüshiche, bir qisim mekteplerde ishxana we siniplargha ot qoyuwétilgen , lékin hökümet da'iriliri bu qétim yüz bergen topilangning heqiqiy mahiyitini yoshurup, metbu'atlargha bu heqte héchqandaq uchur bermigen. (Eqide)