Béyjingda saqchilar jim olturuwalghan erz - shikayetchilerni qolgha aldi

Xitay xelq qurultiyi bilen xitay siyasi meslihet kéngishining memliketlik yighini béyjingda échiliwatqan bir chaghda, béyjing shehiridiki saqchilar düshenbe küni tyen'enmin meydanida jim olturuwalghan 20 neper ezr- shikayetchini qolgha alghan. Metbu'atlar qolgha élin'ghanlar ichide ösmürlerning barliqini xewer qildi.

Roytérs axbarat agéntliqining neq meydandiki weqeni öz közi bilen körgüchilerning sözini neqil keltürüshiche, qolgha élin'ghanlar béyjinggha erz - shikayet üchün kelgen déhqanlar bolushi mumkin bolup, saqchilar ularni élip mangghanda " biz gunahsiz" dep waqirighan. Biraq saqchilar erz - shikayetchilerni bolkiway mashinigha mejburi sélip, élip ketken. Shuning bilen birge saqchilar etraptiki muxbirlarning weqeni resimge tartishini shundaqla weqe toghrisida xewer bérishini chekligen.

Weqeni öz közi bilen körgen yene bir kishining roytérs axbarat agéntliqi muxbirigha bildürüshiche, erz - shikayetchilerning biri " döletni parchilashqa qarshi turush qanuni" gha qarshi turayli dep towlighan.

Xitay hökümiti, siyasi meslihet kéngishi shundaqla xelq qurultiyining yighini bashlinishning aldida béyjing shehiridiki bixeterlik tedbirlirini kücheytip, béyjing shehirige kirip chiqidighan shexsler shundaqla mashina - aptomobillarni qattiq nazaret astigha alghan. Xitay kompartiyisining bixeterlik ishlirigha mes'ul siyasi biro ezasi lugen, ikki yighin jeryanida " düshmen küchler" ge dawamliq zerbe béridighanliqini bildürgen idi. (Erkin)