Shangxey da'iriliri yaponiyige qarshi namayish ötküzgen 42 kishini tutti

Xitay hökümiti shangxeyde yéqinda yaponiyige qarshi namayish ötküzgen kishilerdin 42 ni tutup, ularning 16 sini " jem'iyet tertipini buzush" jinayiti bilen resmiy qolgha aldi.

Amérika birleshme axbarat agéntliqining xewirige qarighanda, tutulghanlarning bir qanchisi shangxey téléwiziye istansisining xewiridiki filimde en'ge élinip, salahiyiti éniqlan'ghan. Filimde bir qisim kishilerning namayish jeryanida yaponiyining shangxeydiki konsulxanisigha botulka atqanliqi hemde bir yapon résturanining eynikini chaqqanliqi körsitilgen.

Xitay metbu'atliri bu heqtiki xewiride, yaponiyige qarshi namayishlarni eyiblimigen, peqet zorawanliq we jem'iyet tertipini buzush qilmishlirigha yol qoyulmaydighanliqini tekitligen.

Xitaydiki yaponiyige qarshi keng kölemlik naraziliq namayishliri, yaponiye yéngi tarix derslik kitabini testiqlighandin kiyin yüz bergen idi. Xitay da'iriliri yaponiyining tarix derslikide yaponiye eskerlirining ikkinchi dunya urushidiki qilmishliri "güzelleshtürülgen" dep qarighan hemde deslepte bu namayishlargha yol qoyghan. Biraq ötken heptidin bashlap, xitay jama'et xewpsizlik ministirliqi tedbir qollinip, yaponiyige qarshi keng kölemlik namayishlarning aldini almaqta.

Xewerge qarighanda, xitay hökümiti yene " 1 - may emgekchiler bayrimi" munasiwiti bilen yaponiyige qarshi namayish ötküzüshke chaqiriq qilghan xitaydiki bir qanche tor betlirini taqighan. (Arzu)