Ding juw shehirining sabiq partkom sékritari tupraqni qanunsiz igiliwélish sewebidin qolgha élindi

6 - Ayning 11 - küni xébéy ölkisi dingjuw shehiri shéngyu nahiyiside yüz bergen ahalilarning hujumgha uchrighanliq dilosi, ammining qattiq naraziliq bildürüshi sewebidin jiddiy tekshürülmekte.

Fransiye agéntliqining xitay yashlar géziti xewirini neqil keltürüshiche, nöwette mezkur dilogha chétishliq shéngyu nahiyisining üch neper partiye sékritari partiyidin qoghlap chiqirilghan.

Buningdin sirt, dingjuw shehiri partkomining sabiq sékritari xé féng, dingjuw shehiri keyyü'en nahiyisining sabiq sékritari yang jingkeyler qolgha élin'ghan bolup, saqchilar, ularning jinayitini choqum éniqlap chiqip qanun boyiche bir terep qilidighanliqini bildürgen. Saqchilar yene, dilogha chétishliq 248 neper gumandardin 106 sini qanun boyiche tekshürüsh arqiliq 21 ademni resmiy qolgha alghan.

11 - Iyun küni, shéngyu nahiye ahalilirining zéminlirini mejburiy tartiwilish jeryanida yüz bergen urush - chéqish we hetta ölüm weqesi, xitay da'irilirini qattiq alaqzade qilipla qalmastin, xelq'ara metbu'atlar we xitayning ichki metbu'atlirinimu jiddiyleshtürwetken idi.

Mezkür weqedin kéyin, xébéy ölkisi dingjuw shehirining rehberliri shéngyu nahiye ahaliliridin hal sorap, ularning qiyinchiliq mesililirini hel qilishqa tirishqan.

Küzetküchilerning éytishiche, xitayda yüz bériwatqan ammining naraziliq heriketliri xelq'araning bésimi sewebidin, xitay hökümitini xelqning bu xil naraziliq teleplirini hel qilishqa mejburlimaqta iken. (Eqide)