Tyen'enmén namayishida türmige tashlan'ghan li wéyxung qoyuwétildi

2007-11-12
Élxet
Pikir
Share
Print

89- Yili béyjing tyen'enmén meydanida élip bérilghan démokratiye namayishta qolgha élinip türmige tashlan'ghan li wéyxung 18 yilidin kéyin qoyuwétilgen bolup, lining dosti yü jijyangning fransiye agéntliqigha bildürgenlirige qarighanda, li wéyxunggha eslide ölüm jazasi höküm qilinip, ikki yil kéchiktürüp ijra qilishqa buyrulghan bolup, yéqindin buyan uninggha artilghan bir nechche gunahlar yéniklitilgendin kéyin, u bügün, 12- noyabir düshenbe küni qoyuwétilgen.

Yü jijyangmu tyen'enmén weqeside qolgha élinip 12 yilliq qamaq jazasigha tartilghan bolup,u 1989- yilidiki namayish jeryanida tyen'enmén derwazisigha ésilghan mawzédungning süritige tuxum atqan 3 yashning birsi idi.

Li wéyxung esli xunenlik ishchi bolup, 1989- yilidiki namayishta qolgha élinip, "lükcheklik qilish" jinayiti bilen eyiblen'gen we 1989- yili ölümge buyrulup ikki yil kéchiktürüp ijra qilish jazasi bérilgen idi.

Fransiye agéntliqida bérilgen xewerdin melum bolushiche, 1989- yili tyen'enmén démokratiye namayishida qolgha élin'ghanlardin 100din artuq adem téxiche xitay türmiside yatmaqta iken.

1989- Yili 15- apréldin 4- iyun'ghiche béyjing tyen'enmén meydanida élip bérilghan namayish, xitay kommunistliri hakimiyet béshigha chiqqandin kéyinki eng zo kölemlik we eng uzun'gha sozulghan démokratiye namayishi bolup, xitay mezkur namayishini herbiy qoshun ewetip qanliq basturghan idi.

Mezkur namayishni xitaydiki bir qisim ziyaliylar we oqughuchilar bash bolup teshkilligen bolup, tekshiligüchi we yétekchilik qilghanlar ichide Uyghur yigiti örkeshmu bar idi. (Jüme)

Pikirler (0)
Share
Toluq bet