Тйәнәнмин оқуғучилар һәрикитигә қатнашқан 100 нәпәр әтрапида сиясий паалийәтчи техичә түрмидә

Мәркизи америкидики диалог фонди җәмийитиниң хәвәр қилишичә, хитай һөкүмити ноябир ейида, тйәнәнмин оқуғучилар һәрикитигә қатнашқанлиқи сәвәбидин 18 йилдин бери түрмидә йетиватқан ли вехуңни қоюп беридикән.

Диалог фонди җәмийитиниң бу мунасивәт билән елан қилған баянатида билдүрүшичә, 1989‏- йели қолға елинған чағда әмдила 21 яшқа киргән ли, 11‏- ноябир күни қоюп берилидикән.

Тйәнәнмин оқуғучилар һәрикити җәрянида, хенән өлкисидә бир карханида ишчи болуп ишләватқан лий, хитай һөкүмити тәрипидин 1989‏- йили април ейида қанлиқ тоқунушларға сәвәб болған бир наразилиқ һәрикитини тәшкиллигән дәп, әйибләнгән.

Ли, 1989‏- йили июн ейида өлүм җазасиға һөкүм қилинған иди. Лекин 1992‏- йили униң үстидин чиқирилған өлүм һөкүми муддәтсиз қамақ җазасиға өзгәртилгән.

Кишилик һоқуқ тәшкилатлириниң хәвәр қилишичә, хитайда һелиму тйәнәнмин оқуғучилар һәрикитигә қатнашқан 100 нәпәр әтрапида сиясий паалийәтчи түрмидә йетиватқан болуп, уларниң көпинчисиниң саламәтлик әһвали начар икән. 17 Йил түрмидә ятқандин кейин, өткән йили қоюп берилгән сабиқ мухбир йү дуңйү түрмидики қейин-қистақлар сәвәбидин әқлини йоқатқан.

Йү дуңйү тйәнәнмин оқуғучилар һәрикити җәрянида мавзедуңниң тйәнәнмин равиқиға есилған рәсимигә сия чачқанлиқи үчүн қолға елинған иди. (Өмәр қанат)