Xitay olimpik" muxbirlar qara tizimliki" pilanini inkar qildi

Seyshenbe küni en'giliye b b s radi'o ‏- téléwiziyisining xewer bérishige qarighanda, xitay tashqi ishlar ministiri lyu jyenchaw, seyshenbe küni muxbirlarni kütiwélish yighinida, muxbirlar qara tizimlikini inkar qilghan. Lyu jyenchaw sözide, " muxbirlarning arxipini turghuzush pilanimiz yoq, peqet salahiyet tekshürüsh we tizimgha élishtin ibaret normal qanuniy xizmet tertipimiz bar" dep körsetken.

Düshenbe küni, junggo kündilik gézitide "xitayning, olimpik jeryanida xitaygha kiridighan chet'ellik muxbirlarning arxipi turghuzghanliqi heqqide xewer bérilgen idi, bu arxip, chet'el axbarat organliri teripidin " muxbirlar qara tizimliki" dep qarilip tenqid qilin'ghan idi.

Xitayning olimpik teyyarliqigha mes'ul rehberliridin li jangjün bilen, sun wéyjya, deslep, chet'ellik muxbirlar arxipi turghuzulghanliqidin xewiri yoqluqini bildürgen bolsimu, arqidin, birleshme agéntliqining muxbiri, xitay kündilik gézitidiki xewerni körsetkendin kéyin, " biz, chet'ellik muxbirlargha yardemde bolush uchun peqet eqelliy melumat jedwili" teyyarliduq", bu chet'ellik muxbirlarni nazaret qilish üchün emes, peqet olimpik jeryanida saxta muxbirlarning herikitini we qanunsiz teshwiqat buyumlirini cheklesh؛ olimpik axbaratchiliri uchun, ochuq, adil we pakize bir muhit yaritish üchün " dep izahat bergen.

Xitay kündilik gézitining düshenbe künidiki xewiride bildürülüshiche, xitayda élip bérilidighan, olimpik tenheriket yighin meydani ichi we sirtida 30 mingche muxbir axbarat béridighan bolup, xitay axbarat we neshiryat ministirliqi bu muxbirlarning arxiplirini turghuzup bolghan. Bu yilining béshida xitay da'iriliri, chet'el muxbirlirining xitay ichide xitayning munasiwetlik orunlirining testiqini almay turupmu xitay ichide erkin ziyaret élip baralaydighanliqi toghrisida belgilime élan qilghan idi.

Halbuki, xelq'ara chégrisiz muxbirlar teshkilati hemde kishilik hoquqni közitish teshkilatlirining bildürüshiche, gerche xitay olimpiktin burun muxbirlarning xitay ichide erkin halda axbarat igilesh erkinlikige ige bolidighanliqi toghrisida wede bergen hem shu heqte bir belgilime élan qilghan bolsimu, xitay öz wedisige xilapliq qilmaqta. (Gülchéhre)