Xitayda her yili 30 dek kishi xata hökümge uchraydu

Xitay metbu'atining düshenbe küni xitay aliy teptish mehkimisining mu'awin bashliqi wang jenchünning sözlirini neqil keltürüp xewer qilishiche, xitayda her yili saqchilarning qéyin-qistaq bilen iqrar qildurushi netijiside 30 dek kishi üstidin xata höküm chiqirilidiken.

Béyjing hökümiti xitayda nahayiti köp uchraydighan, saqchilarning qéyin -qistaq bilen kishilerge ishlimigen jinayetni iqrar qildurush herikitini toxtitish üchün jiddiy tirishchanliq körsitiwatqanliqini bildürmekte.

Bu yil 7‏- ayda xitay hökümiti teripidin élan qilin'ghan yéngi belgilimide, kishilerni iqrar qildurush üchün urush we ach qoyush qatarliq qéyin -qistaq usullirini ishletken saqchilarning sotqa tartilidighanliqi bildürülgen. Lékin hökümetning bu toghridiki belgilimiside, iqrar qildurush üchün kishilerni urup qiynighan saqchilarning qandaq jazalargha uchraydighanliqi heqqide toxtalmighan.

Mart iyida yolgha qoyulghan yene bir belgilimide, saqchi da'iriliridin adem öltürüsh we teshkillik jinayet qatarliq délolar bilen munasiwetlik élip bérilghan pütün soraqlarni ün'alghu we sinalghu lintisigha élishi telep qilin'ghan idi.

2005‏- Yili april éyida, sichüen ölkilik ottura soti, qéyin-qistaq bilen yaki mejburiy élin'ghan iqrar we delillerning sotta ishlitlishige ruxset bérilmeydighanliqi toghrisida qarar chiqardi. (Qanat)