خىتاي دىنىي ئېتىقادنى "ئىناق جەمئىيەت" ئۈچۈن خىزمەت قىلدۇرماقچى

3- مارت دۈشەنبە كۈنى بېيجىڭدا ئۆتكۈزۈلگەن مۇخبىرلارنى كۈتۈۋېلىش يىغىنىدا، خىتاي مەملىكەتلىك سىياسىي كېڭەشنىڭ رەئىسى،كومپارتىيە سىياسىي بيۇروسىنىڭ دائىمىي ئەزاسى جىيا چىڭلىن دىننى ئىناق جەمئىيەت ئۈچۈن خىزمەت قىلدۇرۇش كېرەك ئىكەنلىكىنى ئوتتۇرىغا قويدى.

جىيا چىڭلىن مۇخبىرلارنى كۈتۈۋېلىش يىغىنىدا: " بىز دىنىي ئېتىقاد ئەركىنلىكى سىياسىتىگە تولۇق كاپالەتلىك قىلىپ، دىنىي ئىشلارغا ئالاقىدار بەلگىلىمىلەردىن پايدىلىنىپ دىنىي زاتلار ۋە دىنغا ئېتىقاد قىلغۇچىلارنى يېتەكلەش ئارقىلىق بۇلارنى ئىناق جەمئىيەت بەرپا قىلىش ئۈچۈن ئىجابىي رول ئوينىتىشىمىز كېرەك" دېدى.

1949- يىلى خىتاي كوممۇنىستلىرى ھاكىمىيەت بېشىغا چىققاندىن كىيىن، ئاتېئىزمنى تەرغىب قىلىپ، دىنغا ئىشىنىشنى قاتتىق چەكلەپ كەلگەن بولسىمۇ، ئەمما رويتېرستا كۆرسىتىلىشىچە، يېقىنقى يىللاردىن بۇيان خىتايدا بۇددىزم، تەرىقەتچىلىك، خرىستىئان دىنلىرىغا ئىشەنگۈچىلەر مۇئەييەن دەرىجىدە كۆپەيگەن بولۇپ، بۇ خىل ئەھۋال خىتاي ھۆكۈمىتىنى " ئىناق جەمئىيەت" بەرپا قىلىشتا ئۈزلۈكسىز كۆپىيىۋاتقان بۇ دىندارلار گۇرۇپپىلىرىغىمۇ تايىنىشقا مەجبۇرلىغان.

ئەمما خىتاي رەھبەرلىرى دىنىي ئېتىقادتىن " ئىناق جەمئىيەت " بەرپا قىلىش ئۈچۈن پايدىلىنىش كېرەكلىكىنى ئوتتۇرىغا قويۇۋاتقان پەيتلەردە، ئۇيغۇر ئىلىدىكى مۇسۇلمانلارغا قاراتقان قاتتىق باستۇرۇش سىياسىتىنى تېخىمۇ كۈچەيتمەكتە.

بۇ ھەقتە ئامېرىكا دىنىي ئەركىنلىك كومىتېتى، خەلقئارا كىشىلىك ھوقۇق كومىتېتى ۋە خەلقئارا كەچۈرۈم تەشكىلاتى قاتارلىق ئورگانلار ھەمدە غەرب دۆلەتلىرىنىڭ مۇناسىۋەتلىك تارماقلىرى بايانات ئېلان قىلىپ ياكى ئىسپات بېرىش يىغىنلىرىنى ئۇيۇشتۇرۇپ، خىتاي ھۆكۈمىتىنىڭ ئۇيغۇر مۇسۇلمانلىرىغا قاراتقان باستۇرۇش سىياسەتلىرىنى توختىتىشى ۋە ئولىمپىك يىغىنى ئۈچۈن بەرگەن ۋەدىسىگە ئەمەل قىلىشى ئۈچۈن بېسىم ئىشلەتمەكتە.(جۈمە)