Ваң лишоң хитай алий мәктипиниң уйғурлар һәққидә елип барған райини синаш нәтиҗисини инкар қилди


2008-01-06
Share

Йеқинда хитайниң гуаңдоң өлкисидики җуңшән университети билән хоңкоң баптисит университетиниң бир тәтқиқат гурупписи уйғур дияридики уйғурлар вә хитайлар арисида бир райини синаш паалийити елип барған болуп, мәзкур райини синашта асаслиқи уйғурларниң миллий вә дөләт кимлик чүшәнчиси айдиңлаштурулуп, мутләқ көп санлиқ уйғурниң "шинҗаңниң әзәлдинла җуңгониң бир қисими" икәнликини етирап қилидиғанлиқи хуласиланған.

Әмма, бейҗиңда турушлуқ мустәқил язғучи, йеқинда "сениң шәрқий түркистаниң мениң ғәрбий диярим" намлиқ китабини нәшир қилдурған ваң лишоң әпәнди мәзкур тәкшүрүш нәтиҗисини инкар қилип, униңда ялғанчилиқ барлиқини көрситиду.

Ваң лишоң әпәнди бу һәқтики мақалисидә, " шинҗаңдики милләтләр мунасивитигә қандақ қарайсиз?" дегән соалға %79.5 Уйғурниң "яхши" дәп җаваб бәргәнликини рәт қилип, өзиниң елип барған тәкшүрүшидә %16.3 Уйғурниң яхши дәп җаваб бәргәнликини көрситиду. У йәнә, мәзкур райини синаш паалийитидә чиқирилған %85 уйғурниң "шинҗаң әзәлдин җуңгониң бир қисими" дәп қарайдиғанлиқи һәққидики нәтиҗини инкар қилип, өзиниң тәкшүрүшичә аран %9.3 Уйғурниң шундақ дәп қариғанлиқини билдүриду.

Ваң лишоң юқирида ейтилған райини синашта "өзиниң бир җуңголуқ икәнликидин пәхирлинидиған" уйғурларниң %87.1 Икәнлики һәққидә чиқирилған хуласиниму охшашла инкар қилип, әмәлийәттә ундақ әмәслики, өзиниң тәкшүрүшидә пәқәт %17.5 Уйғурниң шундақ һесаблиғанлиқини тәкитләйду.

Униң қаришичә, һөкүмәт тәшкиллигән һәр қандақ райини синашта уйғурлар өзлириниң раст сөзини вә көңлидики һәқиқий мәйданини ипадилимәйду. У, шу сәвәбтин рәсмий шәкилдә елан қилинған уйғур аммисиниң райини синашниң һәқиқий болмайдиғанлиқини көрсәткән. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт