Wang lishong xitay aliy mektipining Uyghurlar heqqide élip barghan rayini sinash netijisini inkar qildi

Yéqinda xitayning gu'angdong ölkisidiki jungshen uniwérsitéti bilen xongkong baptisit uniwérsitétining bir tetqiqat guruppisi Uyghur diyaridiki Uyghurlar we xitaylar arisida bir rayini sinash pa'aliyiti élip barghan bolup, mezkur rayini sinashta asasliqi Uyghurlarning milliy we dölet kimlik chüshenchisi aydinglashturulup, mutleq köp sanliq Uyghurning "shinjangning ezeldinla junggoning bir qisimi" ikenlikini étirap qilidighanliqi xulasilan'ghan.

Emma, béyjingda turushluq musteqil yazghuchi, yéqinda "séning sherqiy türkistaning méning gherbiy diyarim" namliq kitabini neshir qildurghan wang lishong ependi mezkur tekshürüsh netijisini inkar qilip, uningda yalghanchiliq barliqini körsitidu.

Wang lishong ependi bu heqtiki maqaliside, " shinjangdiki milletler munasiwitige qandaq qaraysiz?" dégen so'algha %79.5 Uyghurning "yaxshi" dep jawab bergenlikini ret qilip, özining élip barghan tekshürüshide %16.3 Uyghurning yaxshi dep jawab bergenlikini körsitidu. U yene, mezkur rayini sinash pa'aliyitide chiqirilghan %85 Uyghurning "shinjang ezeldin junggoning bir qisimi" dep qaraydighanliqi heqqidiki netijini inkar qilip, özining tekshürüshiche aran %9.3 Uyghurning shundaq dep qarighanliqini bildüridu.

Wang lishong yuqirida éytilghan rayini sinashta "özining bir junggoluq ikenlikidin pexirlinidighan" Uyghurlarning %87.1 Ikenliki heqqide chiqirilghan xulasinimu oxshashla inkar qilip, emeliyette undaq emesliki, özining tekshürüshide peqet %17.5 Uyghurning shundaq hésablighanliqini tekitleydu.

Uning qarishiche, hökümet teshkilligen her qandaq rayini sinashta Uyghurlar özlirining rast sözini we könglidiki heqiqiy meydanini ipadilimeydu. U, shu sewebtin resmiy shekilde élan qilin'ghan Uyghur ammisining rayini sinashning heqiqiy bolmaydighanliqini körsetken. (Ümidwar)