Xitay bash ministiri wén jyabaw, emeldarlarni "ijtima'iy adalet" ke chaqirdi

Xitay bash ministiri wén jyabaw jüme küni chaghan bayrimi munaswiti bilen sözligen nutuqida, xitay emeldarlirini " ijtima'iy adalet" ke diqqet qilish toghrisida agahlandurdi. Bu wén jybawning yéqindin béri ijtima'iy adalet toghrisida qilghan bir qatar chaqiriqlirining bir qisimi. U, ötken yili 12 - ayda yerlik hökümetlerning yer zémin mesilisini bir terep qilishta tarixiy xataliq ötküzgenlikini tenqid qilghan.

Shinxu'a axbarat agéntliqi, wén jyabawning chaghan bayrimini kütüwélish ziyapitide hökümet" xelqning japa - musheqetlik xizmet we turmush shara'itini yaxshilash üchün tirishidu " dep sözligenlikini xewer qildi. U, junggo hökümiti ijtima'iy parawanliq, tibbiy dawalash we muhit qatarliq xelq ammisining naraziliqi küchlük mesililerni hel qilish qedimini kücheytidu, dep tekitligen. Shuning bilen birge wén jyabaw, "ijtima'iy muqimliqni" saqlashqa wede berdi.

Xitay puqralirining en'eniwi chaghan bayrimi shenbe küni kechte bashlinidu. Wén jaybawning chaghan bayrimi nutuqidin bir kün ilgiri xitay metbu'atliri dölet re'isi xu jintawning yéza tereqqiyatigha köngül bölüsh toghrisidiki chaghanliq tebrik sözini élan qilghan.

Roytérs axbarat agéntliqining tekitlishiche, bu yil 3 - ayda chaqirilidighan xitay xelq qurultiyi yighini xitayning yéngi besh yilliq tereqqiyat pilanini muzakire qilghanda yéza -kent tereqqiyatigha meblegh ajritish mesilisini muzakire qilishi mümkin. Wén jyabaw ötken yili 12 - ayda qilghan sözide yéza - kentler mesilisini junggo jem'iyitidiki muqimsizliqning sewebi, dep körsetken. Amérikida wapat bolghan xitay yazghuchisi lyu bingyen, dihqanlarni "junggoning mustemlikisi " dep atighan idi. (Erkin)