Daping kömür kénidiki partlash weqeside ölgenlerning sani 82 ge yetti

Xitayning xénen ölkisi daping kömür kénida yüz bergen partlash weqeside ölgenlerning sani 82 ge yetti. 66 Ademning hazirgha qeder iz dériki élinalmidi. Qutquzush xadimlirining bildürüshiche, quduq astida yighilip qalghan kömür gazi qutquzush xizmitige tosalghu yaratmaqta. Qutquzush xadimlirining kan quduqidiki shamal ötküzgüch séstimisi arqiliq quduq astidiki kömür gazini chiqiriwétishke tirishiwatqanliqi bildürüldi. Biraq shinxwa axbarat agéntliqining xewer qilishiche, kan astidiki partlash quduq yolini, tok simlirini we transport qorallirini éghir derijide weyran qilghan bolup, qutquzush xadimlirining quduq astigha chüshishi mümkin bolmighan. Daping kömür kénidiki partlash ötken charshenbe küni yüz bergen, weqe yüz bergende 446 neper ishchi kan astida meshghulat élip bériwatatti.

Weqede ishchilarning 298 nepiri qéchip chiqqan, qalghan 148 neper ishchi kan astida qalghan.. Qutquzush xadimliri bir qanche kündin béri jesetlerning köp qisimini kan astidin élip chiqqan. Xitay dölet re'isi xu jingtaw bilen bash ministir wén jyabaw, kan astidiki ishchilarni derhal qutquzush, weqening sewebini estayidil tekshürüsh toghrisida buyruq chüshürgen. Biraq yerlik da'iriler, kan astidiki ishchilarning hazirghiche tirik qélish ihtimalliqi chong emes dep qarimaqta. Xitay dölet kabinti weqening sewebini tekshürü'ishke mexsus bir guruppa teshkilligen. Daping kömür kénidiki weqe xitayda bu yil ichide yüz bergen eng chong kömür kan weqesi bolup hisaplinidu. (Erkin)