Xitayda yüz bergen kömür kan weqeside ölgenler 200 din ashti

Xitayning lyawning ölkisidiki sün jyawen kömür kénida yüz bergen gaz partlash weqeside ölgenlerning sani 203 ke yetti. Bu xitay boyiche yéqinqi 63 yil ichide eng köp adem ölgen kömür kan weqesi bolup hésablinidu.

Kömür kan astidiki partlash düshenbe küni chüshtin kéyin yüz bergen. Shinxu'a axbarat agéntliqi weqede 28 ishchining yarilan'ghanliqini, 13 kishining kan astida téxiche qalghanliqini xewer qildi. Nöwette 180 kishilik qutquzush etriti kan astida qalghanlarni qutquzush üchün tirishmaqtiken. Partlash weqesi 242 métir chongqurluqtiki kan quduqida yüz bergen. Sün jyawendiki kömür kan, dölet igilikidiki fushin kömür sana'et shirkitige qaraytti.

Roytérs axbarat agéntliqining xewer qilishiche, fushin kömür kan shirkitidiki da'iriler qutquzush xizmitining dawamlishiwatqanliqini shundaqla weqening kélip chiqish sewebini tekshürüsh xizmiti emdi baghlan'ghanliqini bildürgen.

Xitay dölet re'isi xu jintaw bilen bash ministiri wén jyabaw, alaqidar da'irilerge kan astida qalghanlarni pütün küchi bilen qutquzush toghrisida buyruq chüshürgen. Xitay dunya boyiche eng chong kömür sana'et döliti shundaqla kömür kanlarda ölüm - yétim weqesi dunya boyiche eng köp yüz béridighan dölet. 2004 - Yili xitay boyiche kömür kan weqeliride ölgenlarning sani 5 mingdin ashqan. (Erkin)