Хитайниң йәнә бир һәрбий айрупилани чүшүп кәтти


2006.06.14
Share on WhatsApp
Share on WhatsApp

Хитай даирилири чаршәнбә күни хитайниң бир һәрбий айрупиланиниң фуҗйән өлкисидә йәргә чүшүп кәткәнлик хәвириниң растлиқини ениқлиди. Әмма өлүм-йитим әһвали һәққидә бир немә демиди.

Америка бирләшмә агентлиқиниң мәлум қилишичә, хитай җамаәт хәвпсизлик министирлиқи бу хәвәрни ениқлиған болсиму, лекин улар бу вәқә һәрбий мәхпийәтлик һесабланғанлиқи үчүн бу һәқтә мәлуматқа игә әмәсликини билдүргән. Хитайниң дөләт мудапиә министирлиқи болса уларниң бу һәқтә техи һечқандақ доклат тапшуруп алмиғанлиқини, шуңа буниңға бир немә дейәлмәйдиғанлиқини ейтқан.

Бу вәқә хитайда 2 һәптиниң ичидә йүз бәргән 2‏- қетимлиқ хитай һәрбий айрупиланиниң чүшүп кетиш вәқәси болуп, чәтәлдә хитайчә чиқидиған бошүн интернет торида бу вәқәниң дүшәнбә күни әтигән 11:30 ларда йүз бәргәнлики һәмдә айрупиланни һәйдигән учқучиниң парашат билән өзини ташлап қутулуп қалғанлиқи йезилған. Бу торбәттики хәвәрдә мәлум болишичә, вәқә сәвәбидин пәстики бир киши өлгән һәмдә йолда кетиватқан бир киши йоқап кәткән.

3‏-Июн күни әнхүйдә йүз бәргән вәқәдә айрупиландики 40 нәпәр һәрбий хадимниң һәммиси өлгән болуп, хитай һөкүмити бу вәқә йүз берип 30 нәччә саәттин кейин, андин бу һәқтә мәлумат бәргән иди. Бу хитай һәрбий даирилириниң һәрбий ишларға даир учурларни қанчилик чиң тутидиғанлиқини көрситип бериду.

Бошүн тор бетиниң мәлум қилишичә, вәқә йүз бәргән фу җйәнниң чеңмен шәһири әтрапида хитайниң бир һава армийә базиси бар икән. Шундақла бу әтрапта олтуридиған деһқанлар бу җайда даим юқири авазлиқ айрупиланларниң учуп йүрүйдиғанлиқидин зарланған. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.