Dunya sehiye teshkilati xitayning sars weqesidiki ipadisini tenqid qildi

Dunya sehiye teshkilati sars késili heqqide doklat élan qilip, wéytnam bilen sin'gaporning 2003 - yili partlighan sars késili weqesidiki ipadisini maxtidi. Lékin xitayning eyni chaghda weqeni yoshurghanliqini we deslepki chaghda sars késilining tarqilishini ret qilghanliqini eyiblidi. Bu doklat dunya sehiye teshkilatining hazirghiche xitayni tunji qétim ashkara eyiblishi bolup hésablinidu.

" Dunya sehiye teshkilati " sars: bir qétimliq dunyawiy yuqumlinish weqesi qandaq toxtitiwélindi " digen mawzudiki doklatida eng köp tenqidni xitaygha qaratqan.

Birleshme axbarat agéntliqining ilgiri sürüshiche, dunya sehiye teshkilatidiki xadimlar hazirghiche xitayni ashkara tenqid qilish uning ghezipini qozghaydu yaki dunya sehiye teshkilati bilen hemkarlishishni toxtitip qoyidu, dep ensirimekte idi. Lékin bu qétim 307 betlik doklatta xitayni ashkara tenqidlidi.

Doklatta eskertishiche, xitay hökümiti 2002 - yili 11 - ayda sars késili partlap 3 ayghiche uni yoshurghan. Mezkur organ2003 - yili 2 - ayda weqedin xewer tapqandin kéyin 3- ayning 22 - küni junggo sehiye ministiri jang wénkang bilen xongkongda söhbet élip barghan we késellikke da'ir uchur bilen teminleshni telep qilghan. Lékin doklatta dunya sehiye teshkilati " ümid qilghan nersige érishelmidi " deydu. Doklatta eskertishiche, dunya sehiye teshkilati xitay bilen xet alaqisi, téléfon we öz ‏- ara uchrishishlar élip barghan bolsimu, lékin junggo hökümiti " wirusining memliket ichi we sirtigha kéngiyiwatqanliqi heqqidiki agahlandurushqa qulaq salmighan " .

Doklatta , béyjing doxturxanisida bezi xadimlarning sars késilini yuqturuwalghanliqini, lékin doxturxana da'irilirining buni ret qilghanliqini yazdi. Shu qétimqi weqede sars késili dunya boyiche 30 döletke tarqalghan. 8000 Adem mezkur wirus bilen yuqumlan'ghan we 800 adem ölgen idi. (Erkin)