Sichüende tongguz wirusi bilen ölgenler sani 31 ge yetti

Uyghur aptonom rayonidiki da'iriler xitayning gherbiy - shimalida sichü'endiki yézilarda bayqalghan tungguz wirusining hazirghiche ürümchide bayqalmighanliqini élan qildi.

Ürümchi sheherlik déhqanchiliq we charwichiliq idarisining peyshenbe küni bildürüshiche, mezkur wirus hazirghiche ürümchi rayonida bayqalmighan. Da'iriler tungguz wirusining Uyghur aptonom rayonigha tarqilishigha qarshi aldini élish tedbiri alghanliqini bildürmekte. Emma bu arida xitay hökümiti tongguz wirusining kontrol astigha élin'ghanliqini jakarlap, puqralarni xatirjem bolushqa chaqiriwatqan bir chaghda, jüme künige qeder mezkur wirus bilen ölgenler sani 31 ge yetti.

Xitay da'irilirining ashkarilishiche, hazirgha qeder mezkur wirus bilen yuqumlan'ghanlar yaki yuqumlan'ghanliqi guman qiliniwatqanlar 152 etrapida bolup, 27 kishining késel ehwali éghirken. Xitay sehiye ministiri gaw chyang jüme küni " késel hazirche kontrol astigha élindi," dep körsetti.

Emma dunya sehiye teshkilatining bayanatchisi bab deytisning tekitlishiche, wirusni kontrol astigha élindi déyishke téxi baldurluq qilidiken. U, "chünki yéngi késeller we ölgenler bayqiliwatidu," didi. Xitay hökümiti jüme küni wirus bayqalghan rayondin béyjinggha tongguz göshi we tongguz mehsulatlirini kirgüzüshni cheklidi. Da'iriler béyjinggha kirish éghizlirida tekshürüsh ponkitlirini qurghan. (Erkin)