Amérika: xitay wedisige "uyatsizlarche" xilapliq qilmaqta

Amérika da'iriliri seyshenbe küni xitayni dunya soda teshkilatigha kirishte bergen wedisige éghir derijide, bezide " uyatsizlarche" xilapliq qilmaqta, dep eyiblidi.

Amérikining yardemchi soda wekili stiratford, xitayning dunya soda teshkilatigha eza bolghandin kéyin dunya soda teshkilati qa'idilirini ijra qilish xatirisi "qalaymiqan" dep körsetti. Stiratfordning eskertishiche, xitay bazirini échiwétishke wede qilghan bolsimu, biraq marka hoquqi we patént hoquqini qoghdash qatarliq jehetlerde wedisini ijra qilishtin téxi yiraqta iken.

Stiratford, xitayda yumshaq détallar, muzika we kino filim etkeschiliki omumyüzlük ehwal bolup, " bular dunya soda teshkilati qa'idilirige xilap qilmishlarning bir qisimi" deydu. Stiratfordning eskertishiche, u xitayda 23 yil xizmet qilghan bolsimu, emma qanunluq sin'alghu yaki ün'alghu özeklirini qeyerdin sétiwélishni tapalmighan.

Stiratford bu sözlerni soda doklati élan qilish munasiwiti bilen dölet mejliside guwahliqtin ötkende sözlidi. U, " xitay dunya soda teshkilatining bazarni échiwétish, kemsitishke we milletchilikke qarshi turush qatarliq prinsiplirini toluq yolgha qoymidi" deydu. Uning eskertishiche, xitayda bazar méxanizimining qélipi téxi shekillinip bolmighan. Amérikining xitay bilen bolghan sodidiki qizil reqimi bu yil 200 milyard dollardin éship kétishi mumkin.

Stiratfordning eskertishiche, xitay 2006- yili dunya soda teshkilatining eqliy mülük hoquqi we aptomobil import belgilimisi qatarliq mesililerdiki éghir bésimigha duch kélidiken. Bu doklat amérika hökümiti d s t ning xongkongdiki yighinida xitay bilen yéza igilik mehsulatliri sodisi boyiche kélishim hasil qilishni ümid qiliwatqan bir chaghda élan qilindi. (Erkin)