Xarbinda su bilen teminlesh eslige keldi

Yekshenbe küni xitayning xarbin shehirige qaytidin su bérilishke bashlidi. Sheherlik hökümet ötken seyshenbe küni jélindiki bir ximiye zawutida meydan'gha kelgen bir partlash netijiside, sungxu'ajyang deryasidiki bulghinish sewebidin xarbin shehiride su tarqitishni toxtatqan idi. Mezkur partlash weqeside 5 kishi ölgen bolup, hökümet rayondin 10ming kishini bashqa yerlerge yütkigen idi.

Xélungjyang ölkisi teshwiqat idarisi bayanatchisining éytishiche, élip bérilghan tekshürüsh netijiside sudiki ximiyiwiy maddilarning nsbiti normal sewiyige irishken , shunga xarbin sheherlik hökümet su tarqitish ishini qaytidin bashlashni qarar qilghan.

Hökümet deslepte weqeni xelqtin yoshurup, derya süyige qandaq ximiyilik maddilarning quyulup ketkenlikini ashkarilimidi. Lékin weqedin bir nechche kün ötkendin kéyin sungxu'ajyang deryasigha 100 tonna binzol maddisining ariliship ketkenlikini élan qildi.

Xewerlerge qarighanda, shenbe küni xarbin shehirini ziyaret qilghan xitay bash ministiri win jya baw weqe üstidin jiddiy tekshürüsh élip bérilidighanliqini tekitlep, xarbin hökümet da'irilirini pütün sheher ahalisini su bilen teminleshke chaqirdi.

Amérika birleshme agéntliqining xewer qilishiche, xarbinda yüz bergen su ning bolghinish weqesi muhit bulghinishining aldini élishni özining nishanliridin biri dep élan qilghan xitay dölet re'isi xujintawning inawitige bir zerbe hisablinidiken.

Shundaqla shenbe küni xitay tashqi ishlar minstiri, béyjingda turushluq rusiyining bash elchisidin, sungxu'ajyang deryasidiki bulghinishning rusiyige keltürgen ziyini tüpeylidin rusiye hökümitidin kechürüm soridi. (Qanat)