Bir xelq qurultiyi wekili xitay pulining üstidiki maw zidung resimini éliwétish teklipi berdi

Xitay metbu'atlirining xewer qilishiche, xitay hökümiti xelq pulining üstidiki maw zidungning resimini éliwétip, uning ornigha xitay tarixidiki meshhur bir shexsning resimini bésishi mümkin.

Bir qurultay wekili béyjingda échiliwatqan xitay xelq qurultiyining memliketlik yighinida, maw zidungning yüz somluq puldiki resimini éliwétip, uning ornigha ding shyawpingning resimini bésish teklipini bergen. Beziler yüz somluq pulgha manju impiriyisini aghdurup, xitay jumhuriyitini qurghan sung jungsenning resimini bésish teklipini bermekte. Biraq közetküchilerning eskertishiche, bu teklipning xelq qurultiyi teripidin qobul qilinip resmiy qanun'gha aylinishi üchün bir mezgil waqit kétishi mümkin.

Ilgiri maw zidunggha choqunush xitay boyiche omumyüzlik ehwal bolsimu, emma hazir xitayda maw zidungning chong hejimdiki heykellirini Uyghur aptonom rayonining qeshqer shehiridin bashqa jaylarda uchratqili bolmaydu.

Ding shyawpingning resimini teshebbus qilghuchilarning eskertishiche, xitay iqtisadining tereqqiyati we xelq'ara tesirining yüksilishide dingshyawpingning töhpisi zor. Emma ding shyawping eyni chaghda shexske choqunushni tenqid qilip, maw zidungning iznikini ishlepchiqirishni toxtatquzghan idi. Emma xelq puligha ding shyawpingning resimini bésishqa qarshi turghuchilar, ding shyawpingni 1989 - yildiki tyen'enmin oqughuchilar herikitini basturushning birinchi nomurluq jawabkari, dep eyiblimekte. (Erkin)