Yashan'ghanlar nisbitining pewqul'adde yuqiriliqi- xitaygha bésim

Xitay yashan'ghanlar xizmiti komitétining ashkarilishiche, xitay nopusidiki yashan'ghanlar nisbitining yuqiri bolush mesilisining dawamliq éghirlishishi nöwette xitayning iqtisadi hem jem'iyet tereqqiyatigha zor bésim élip kelgendin bashqa, xitayda yashan'ghanlar parawanliq ishlirining tereqqiyatighimu éghir tosalghu élip kelmekte iken.

Tekshürüsh netijilirige asaslan'ghanda, xitay yashan'ghanlar nopusining jiqliqi jehette dunya boyiche eng aldinqi orunda bolup 60 yashtin halqighanlar nopusi pewqul'adde zor nisbetni igileydiken. Shundaqla xitaydiki yashan'ghanlar,dunya yashan'ghanlar nopusining %21.4 Tini igileydiken. Bu dégenlik pütün yawropadiki yashan'ghanlarning omumiy sani bilen barawer kélidiken.

Xewerlerde körsitilishiche, xitayda yashan'ghanlar nisbiti yuqiri bolupla qalmay, bu nisbet xitayda nopus köpiyish sür'itidin besh hesse yuqiri nisbette téz sür'ette örlimekte.

Shuning bilen bir waqitta nopus mutexessislirining tetqiqatlirigha qarighanda, yashan'ghanlarning köpiyishige masliship tereqqiy qilishqa tégishlik nurghun saheler yenila intayin kemchil hem yétersiz bolghanliqtin ularning sughurta, dawalinish, béqilishqa oxshash jiddiy éhtiyajliq terepliri kapaletlenmigen, eger yashan'ghanlar nopusi mushu sür'ette mangghanda 2030 - yiligha barghanda xitay jem'iyiti zor iqtisadiy hem ijtima'iy krizisqa yüzlinidiken. (Gülchéhre)