Xitay da'iriliri prézidént bushni térrorchiliqqa qarshi küreshke diniy ton kiydürüsh bilen eyiblidi

Xitay diniy ishlar idarisining bashliqi yéy shawwén"xelq géziti" ning jüme künki sanida maqale élan qilip, prézidént bushni térrorchiliqqa qarshi küreshke "islam fashizimigha qarshi" , " ehli-selpchi" ton kiydürmekchi boldi, dep eyiblidi.

Yéy shawwénning kompartiye organ neshr epkari "xelq géziti" ning bash istonidiki bu maqalisi waqit jehette amérika dölet mejlisi charshenbe küni xitayning diniy erkinlik ehwali heqqide ispat bérish yighini chaqirghan we yighinda terepler xitayning diniy siyasitini tenqid qilip ikki kün ötkendin kéyin élan qilindi.

Amérika dölet mejlisidiki shu künki yighinda xitay türmisidiki kanada puqrasi höseyin jélilning xanimi kamile télendibayéwa guwahliq bergen shundaqla xitay da'irilirini diniy erkinlik we xelq'ara qanunlargha xilapliq qilish bilen eyibligen idi.

Birleshme axbarat agéntliqining eskertishiche, yéy shawwén, prézidént bushning "ehli-selp" we "islam fashizmi "dégen atalghularni tilgha alghanliqi térrorchiliqqa qarshi küreshning diniy ton'gha oralghanliqini körsitidu, dep yazghan. U," térrorchiliqqa qarshi küreshni qandaqmu konkrét bir din'gha baghlighili bolsun " deydu.

Lékin birleshme axbarat agéntliqi bu heqtiki xewiride, "xitaylar térrorchiliqqa qarshi turushni bahane qilip, Uyghur aptonom rayonidiki musulmanlargha téximu köprek aptonomiye bérilishini telep qiliwatqan pa'aliyetchilerni basturiwatidu, dep eyiblenmekte" dep körsetti.

Xitay da'iriliri Uyghur aptonom rayonida déhqan we sheher ahalisi ichidiki yashan'ghanlarning meschitke kirishini cheklimisimu, lékin 18 yashtin töwen yash- ösmürler, pénsiyige chiqqanlar, ziyaliylar, partiye ezaliri, dölet ishchi - xizmetchilirining meschitke kirishini cheklimekte. (Erkin)