Хитай демократийә партийисиниң қурғучилириниң бири қоюп берилди

Мәркизи хоң коңдики кишилик һоқуқ вә демократийә учур мәркизиниң шәнбә күни хәвәр қилишичә, бейҗиң һөкүмити, хитай демократийә партийисиниң қурғучилиридин бери болған вә сәккиз йилға йеқин бир вақиттин бери түрмидә йетиватқан мав чиңшияңни қоюп бәргән.

Хәвәрдә ейтилишичә, мав чиңшияң җүмә күни җеҗияң өлкисиниң хаңҗу шәһиридики өйигә қайтип кәлгән.

Мав , 1999‏- йили дөләт һакимийитини ағдурушқа урунған дегән җинайәт билән әйиблинип, сәккиз йиллиқ қамақ җазасиға һөкүм қилинған иди. Кишилик һоқуқ вә демократийә учур мәркизиниң билдүрүшичә, хитайда паалийити чәкләнгән хитай демократийә партийисиниң 23 әзаси һелиму түрмидә ятмақта икән.

Бейҗиң һөкүмити, хитай демократийә партийисини 1998‏- йили йәни мәзкур партийиниң қурулушидин узун өтмәй чәкләп, партийиниң нурғун әзалирини қолға алған иди.

Сиясий мулаһизичиләр, мав чиңшияңниң муддәттин бурун қоюп берилгәнликини, бейҗиң һөкүмитиниң 2008‏- йиллиқ бейҗиң олимпик тәнһәрикәт йеғини һарписида, кишилик һоқуқ дәпсәндичиликлири түпәйлидин, дуняда күнсери начарлишиватқан образини яхшилаш үчүн елип бериватқан паалийитиниң бир қисими дәп, көрсәтмәктә.

Франисйә агентлиқиниң хәвәр қилишичә, 57 яштики мав чиңшяң түрмидин қоюп берилгәндин кейин бәргән баянатида, " әгәр миниң түрмидә ятқанлиқим, хитайда демократийә вә кишилик һоқуқ мәсилисиниң илгирилишигә һәссә қошқан болса, түрмидә ятқинимдин һечқачан әпсусланмаймән," дегән. (Өмәр қанат)