An'géla markél xitay bash ministiri bilen iran we kishilik hoquq mesililirini muzakire qildi

Gérmaniye bash ministiri an'géla markél xitayda élip barghan tunji ziyaritide düshenbe küni xitay bash ministiri wén jyabaw bilen iran yadro pilani we kishilik hoquq qatarliq gherb elliri bilen xitay otturisida pikir birliki bolmighan mesililer boyiche söhbet élip bardi.

Shuning bilen birge xitay - gérmaniye iqtisad , soda alaqisini rawajlandurush an'géla markélning bu qétimqi xitay sepiride yetmekchi bolghan muhim nishanlirining biri. Xitay bilen gérmaniyining 2005 - yildiki soda hejimi 63 milyard dollargha yetken.

Markélning muxbirlargha ashkarilishiche, u xitay bash ministiri wén jyabaw bilen iran yadro qorallirigha ige bolmasliqi kérek, dégen mesilide ortaq tonush hasil qilghan. Lékin u, iranni yadro qorallargha ige bolushtin qandaq waz kechtürüsh mesiliside xitay bilen ortaq chüshenche hasil qilghan yaki qilmighanliqini tilgha almidi.

Markél yawropa ittipaqining xitaygha qoyghan qoral - yaraq imbargosini bikar qilishqa qarshi turghan idi. U, wén jyabaw bilen kishilik hoquq mesilisini muzakire qilghanliqini we bu mesilining buningdin kéyin dawamliq otturigha qoyulidighanliqini bildürdi. Markél, " men wén jyabawgha kishilik hoquqning ayrip qarighili bolmaydighan mesile ikenlikini éniq yetküzdum " deydu.

Markélning eskertishiche, u eqliy mülük hoquqini qoghdash mesilisini otturigha qoyghan we xitay bilen gérmaniyining énérgiye sahesidiki hemkarliqini kücheytishni ümid qilghan. An'gél markélning 4 kün dawamlishidighan xitay ziyariti yekshenbe küni bashlandi. U bu jeryanda shangxeyni ziyaret qilidu. (Erkin)