Хитай даирилири һава қатнаш бихәтәрлик тәдбирлирини күчәйтти


2008-03-14
Share

Хитай даирилири йеқинда бир уйғур қизниң түнүкә қутидики бензин билән үрүмчи - бейҗиң арисида қатнайдиған бир йолучилар айрупиланини партлатмақчи болғанлиқини илгири сүрүп, бу вәқәни шәрқий түркистан күчлиригә бағлиғандин кейин, хитай һава қатнаш бихәтәрлик даирилири йолучиларниң айрупиланға суюқлуқ елип чиқишни чәклиди.

Хитай дөләтлик авиатсийә идарисиниң тор бетидә елан қилинған бу һәқтики бәлгилимидә йолучиларниң қолсомкисини тәкшүрүшни күчәйтиш, пул төлигәнләрни айрупиланға тез чиқириш мулазимитини чәкләш вә айрудурумға киргән машиниларни тәкшүрүш тәләп қилинди.

Хитай һөкүмити 7 - март күни йүз бәргәнликини илгири сүргән "айропилан вәқәси"дә аталмиш террорчиларниң " алдам халтиси" ға чүшүп кәткән йолучи қизға аит учурларни елан қилиштин давамлиқ өзини қачурмақта.

Чәтәлдә чиқидиған гезит - жорналларниң бу вәқә тоғрисидики хәвири билән хитай мәтбуатлирида берилгән бу вәқә тоғрисидики хәвәрләрниң тиндинсийисидә зор пәрқләр мәвҗут болуп, чәтәлдики мәтбуатлар хитай даирилириниң бу вәқә тоғрисидики баянлириға гуман билән қаримақта вә немә үчүн бу қизниң исми, юрти, аилә әһвали вә рәсимини һазирға қәдәр елан қилмиғанлиқиға әҗәбләнмәктә. Хәлқара кишилик һоқуқи тәшкилатлириниң бу вәқәдики әндишиси болса "хитай даирилириниң бу вәқәни уйғурларни илгирлигән һалда бастуруш баһаниси қиливелиш еһтималидур."

Лекин хоңкоң вә хитай чоң қуруқлуқидики мәтбуат, тор бәтлиридә бу вәқә һәм уйғур йолучи қиз тоғрисида һәр түрлүк қияс вә миш- миш гәпләр еқип йүрмәктә. Һәтта хоңкоңдики "юлтузлуқ арал" ға охшаш гезитләрниң тор бетидә бу қизниң юрти, исми, рәсими, кәспий, кимлики тоғрисида тохталмай, "террорчилар"ниң йолучи қизни 6 йешидин башлап чәтәлдә тәрбийилигәнликини илгири сүргән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт