Хитай тәһдитләргә қарши һәрбий күчини техиму ашуруш нәзәзийисини көтүрүп чиқти

Хитай коммунистик партийисиниң зувани болған "һәқиқәт изләш" жорнилида елан қилинған баш мақалидә, хитайниң һазир нурғун муқимсизлиқ вә тәһдитләргә дуч келиватқанлиқи, шу сәвәбтин хитайниң һәрбий күчини техиму ашурушқа еһтияҗлиқ икәнлики көрситилгән.

Мақалидә, " һазир хитайда муқимсизлиқ амиллири барғансери күчийиватиду һәмдә бу хитайниң бихәтәрлик муһитиға чоң тәсир көрситиватиду. Тарих шуни испатлиғанки, башқиларниң тинчлиқ беришигә тайинипла олтурғили болмайду. Пәқәт күчлүк армийә билән пухта дөләт мудапиәсила ишәнчлик бихәтәрлик чариси болалайду" дәп йезилған.

Хитай компартийисиниң зувани болған "һәқиқәт изләш" жорнили даим юқири дәриҗилик хитай әмәлдарлири вә нәзәрийичиләрниң мақалилирини елан қилиду. Гәрчә бу мақалидә хитай һөкүмитиниң дуч келиватқан тәһдитлириниң немә икәнлики конкрет көрситилмигән болсиму, лекин униңда ' дүшмән ғәрб күчлири күчлүк хитай дөлитини көрүшни халимайду" дәп йезилған.

Хитайниң 2 милйон 300 миң кишилик азатлиқ армийиси дунядики әң зор көләмдики армийә һесаблиниду. Бейҗиң һөкүмити йәнә 2006‏- йилидики һәрбий хираҗитини 15% өстүрүп, 35 йерим милярд америка доллириға йәткүзидиғанлиқини билдүрди. Гәрчә бу рәқәм америкиниң һәрбий хираҗитидин азрақ болсиму, лекин америка даирилири хитайниң һәққий һәрбий хираҗитиниң улар елан қилғандин нәччә һәссә көп икәнликини билдүрмәктә. (Пәридә)