Xitay tehditlerge qarshi herbiy küchini téximu ashurush nezeziyisini kötürüp chiqti

Xitay kommunistik partiyisining zuwani bolghan "heqiqet izlesh" zhornilida élan qilin'ghan bash maqalide, xitayning hazir nurghun muqimsizliq we tehditlerge duch kéliwatqanliqi, shu sewebtin xitayning herbiy küchini téximu ashurushqa éhtiyajliq ikenliki körsitilgen.

Maqalide, " hazir xitayda muqimsizliq amilliri barghanséri küchiyiwatidu hemde bu xitayning bixeterlik muhitigha chong tesir körsitiwatidu. Tarix shuni ispatlighanki, bashqilarning tinchliq bérishige tayinipla olturghili bolmaydu. Peqet küchlük armiye bilen puxta dölet mudapi'esila ishenchlik bixeterlik charisi bolalaydu" dep yézilghan.

Xitay kompartiyisining zuwani bolghan "heqiqet izlesh" zhornili da'im yuqiri derijilik xitay emeldarliri we nezeriyichilerning maqalilirini élan qilidu. Gerche bu maqalide xitay hökümitining duch kéliwatqan tehditlirining néme ikenliki konkrét körsitilmigen bolsimu, lékin uningda ' düshmen gherb küchliri küchlük xitay dölitini körüshni xalimaydu" dep yézilghan.

Xitayning 2 milyon 300 ming kishilik azatliq armiyisi dunyadiki eng zor kölemdiki armiye hésablinidu. Béyjing hökümiti yene 2006‏- yilidiki herbiy xirajitini 15% östürüp, 35 yérim milyard amérika dollirigha yetküzidighanliqini bildürdi. Gerche bu reqem amérikining herbiy xirajitidin azraq bolsimu, lékin amérika da'iriliri xitayning heqqiy herbiy xirajitining ular élan qilghandin nechche hesse köp ikenlikini bildürmekte. (Peride)