Пакистанда өлтүрүлгән хитай инженирлириниң җәсиди үрүмчигә қайтуруп келинди

Пакистанниң ғәрбий җәнубида өткән күни өлтүрүлгән үч нәпәр хитай инженириниң җәсиди, пакистан һәрбий даирилириниң бир транспорт айрупиланида җүмә күни үрүмчигә қайтуруп келинди. Бу 3 нәпәр хитай инженири вә уларниң шопури өткән чаршәнбә күни балуҗистанниң хаб районида мотосиклит мингән қораллиқ кишиләр тәрипидин оққа тутулғандин кейин өлгән.

Вәқәдин кейин балуҗистандики етник милләтчи қораллиқ бир тәшкилат, вәқәгә мәсул болидиғанлиқини җакарлиди. Бу вәқә пакистан президенти пәрвиз мушәррәпниң 19 - феврал күни елип берилидиған хитайдики зиярити башлиништин сәл илгири йүз бәргәнликтин тәрәпләрниң җиддий инкасини қозғиған. Пакистан баш министири шавкәт әзизи, вәқәниң җавапкарлирини чоқум тапидиғанлиқиға вәдә бәрди.

Пакистан хитайниң әң муһим қорал - ярақ херидари вә бу икки дөләт шәрқий түркистан күчлиригә бирлишип қарши туруштин тартип, сода вә ядро пиланлири бойичә һәмкарлиқ елип беришқичә болған кәң даирилик мәсилиләрдә истиратегийилик шерикләр иди. Шуңа пакистан һөкүмити хитай инженирлириниң өлүмигә алаһидә әһмийәт бәрди.

Җүмә күни хитай пуқралириниң җәсидини елип маңған пакистан һәрбий айрупиланини хитайниң исламабадтики баш әлчиханиси вә пакистан һөкүмитидики юқири дәриҗилик әмәлдарлар айдурумда мурасим билән узутуп қойған. Хитай инженирлириниң җәсиди юқири дәриҗилик пакистан әмәлдарлириниң һәмралиқида үрүмчигә елип берилди. Җәсәтләр үрүмчидин өлгүчиләрниң юрти хефейға елип берилидикән. (Әркин)