Хитай һөкүмитиниң шәндоң өлкисидә йүз бәргән көмүр кан вәқәсини тәбиий апәт дәп көрситиши наразилиқ қозғиди

Хитай һөкүмитиниң, шәндоң өлкисидики икки көмүр канда йүз бәргән су бесип кетиш вәқәсини тәбиий апәт дәп көрситиши, хәлқниң наразилиқини қозғиди.

Франсийә агентлиқиниң хәвәр қилишичә, хитай һөкүмитиниң шәндоң өлкисидики көмүр канда йүз бәргән вә 181 ишчиниң из-дерәксиз йоқ болуп кетишини кәлтүрүп чиқарған кәлкүн вәқәсини, тәбиий апәт дәп көрситиши, вәқәдә қурбан болғанларниң аилилириниң қаттиқ наразилиқини қозғиған . Улар һөкүмәтни кан ишчилириниң бихәтәрликини қоғдаш үчүн керәклик тәдбир алмиған дәп, әйиблимәктә.

Хитай хәлқ ишлири министири лий шүйҗу, чаршәнбә күни бейҗиңда мухбирларға бәргән баянатида," мутәхәссисләрниң тәкшүрүшидин кейин, көмүр кандики бу қетимқи кәлкүн вәқәсиниң тәбиий апәтләр категорийисигә киридиғанлиқи ениқланди. Шуңа қанунларға асасән, вәқәдә қурбан болғанларниң аилилириниң төләм тәләп қилиш һоқуқи юқ" дегән.

Хитайниң мәвҗут қанунлирида тәбиий апәтләрдә өлгән яки яриланғанларға төләм төләш системисиниң мәвҗут әмәсликини тәкитлигән хитай хәлқ ишлири министири, "лекин шундақтиму, һөкүмәт вә көмүр кан ширкәтлири вәқәдә өлгәнләрниң аилилиригә мәлум бир миқдарда пул ярдәм қилиши мумкин" деди.

Хитай хәлқ ишлири министириниң бу баянати, шәндоң өлкисидики көмүр канларда йүз бәргән вәқәдә из--дерәксиз йоқ болуп кәткән кан ишчилириниң уруқ- туғқанлирини қаттиқ ғәзәпләндүргән. Улар һөкүмәтниң вәқә һәққидики изаһатини қобул қилмайдиғанлиқини, сотқа әрз сунидиғанлиқини билдүрмәктә.

Хәвәрләргә қариғанда, вәқәдә ‏из-дерәксиз йоқ болуп кәткәнләрниң уруқ-туғқанлири билән хитай сақчилири оттурисида қаттиқ тоқунушлар йүз бәргән. (Қанат)