Xitay "qanun teshwiqat küni" harpisida namayishchilarning naraziliqigha duch keldi

Xitaydiki "qanun teshwiqat küni" harpisida béyjingda xitayning herqaysi jayliridin kélip adalet telep qiliwatqan erziyetchiler namayish élip barghan bolup, emma mezkur namayish xitay saqchilirining basturushigha uchridi.

Fransiye agéntliqi xewiride körsitilishiche, , namayishchilar, béyjinggha xitayning jay-jayliridin kelgen 100 lerche erziyetchiler bolup, puqrache kiyin'gen xitay saqchiliri sin'alghugha élishqa bashlighanda , ular terep-terepke qéchiship ketken.

Erziyetchilerdin biri bolghan wang gulyen fransiye agéntliqigha namayish qilishining sewebini chüshendürüp: "biz choqum ittipaqliship, biz yoluqqan adaletsizlikni we tartqan elemlirimizni jem'iyetke bildürishimiz kérek" dégen.

Melum bolushiche, namayishchilar, saqchilarning adem urushi, hökümetning yer ‏- zéminini igiliwélishi we yerlik emeldarlarning yer ‏- zéminni musadire qilishi qatarliq adaletsiz qilmishliri ashkarilan'ghan pakitlarni kötürüshüp, merkiziy hökümetning nachar erziyet ishlirini eyibligen.

Wang famililik namayishchining bildürüshiche yene, chirik yerlik emeldarlar qanunni awam xelqning hayati bilen oynishidighan qoralgha aylanduruwalghan, köpchilikning qan-ter bedilige kelgen bayliqlarni igiliwalghan we qanun bilen qoghdinishqa tigishlik xelqni qanun arqiliq ezgen iken.

Fransiye agéntliqida bérilgen xewerdin ashkarilishiche, bu nöwet namayishqa qatnashqan kishilerning köp qisimi bu yil öktebirde xitay merkizi hökümitige, démokratiyini ilgiri sürüsh we bir partiyilik kommunist hakimiyitige xatime bérishke chaqirip ochuq xet yollighan kishilerdin iken.

4- Dékabir küni pütün xitay miqyasida, "qanunni teshwiq qilish küni" tebriklinidighan bolup, hökümet buni "qanun bilen idare qilish" ishlirini ilgiri sürüsh pa'aliyiti dep süretlep kelmekte. (Jüme)