Хитай бейҗиңда олимпик мунасивити билән мәҗбурий өй көчүргәнликини инкар қилди


2007.06.05

Шиветсарийиниң җәнвәдики инсан һәқлири тәшкилатлиридин болған " олтурақ җай һоқоқи мәркизи" илгири доклат елан қилип , хитай һөкүмитиниң олимпикқа тәйярлиқ қилиш басқучида бейҗиңда олимпик қурулуши елип бериш даирисидин башқа районларға мәҗбурий көчүргән аһалиниң бир милйон 250 миңға йәткәнликини елан қилип , хитай һөкүмитиниң нәччә он миң аһалини мәҗбурий көчүргәнликини әйиблигән иди.

-5 Июн хитай даирилири бу хил әйибләшләргә рәддийә берип , бейҗиң аһалилирини мәҗбурий көчүрүш елип барғанлиқини инкар қилди. Һәмдә юқуриқи санлиқ мәлуматларни асассиз деди.

Әнгилийә б б с радио ‏- телевизийә ториниң хитай ташқи ишлар министирлиқи баянатчиси җияң йүниң ахбарат елан қилиш йиғинида қилған сөзлирини нәқил кәлтүрүшичә " 2002 - йилидин буян бейҗиң олимпик тәнһәрикәт сарайлирини қуруш җәрянида бирму аилини мәҗбурий көчүрүш һадисиси көрүлмигән, қурулуш даирисидики җәмий 6037 аилиниң һәммиси мувапиқ җайлаштурулған икән."

Әмма , олтурақ җай һоқоқи мәркизи бу мәҗбурий көчүрүлгәнләр тоғрисидики санлиқ мәлуматларниң , хитай һөкүмәт даирилириниң елан қилған ситатистикилиқ мәлуматлириға асасән чиқирилғанлиқини билдүргән һәмдә һәр бир өй ‏- маканлиридин айрил кишиләрни бирму ‏- бир ениқлап бекитишниң мумкин әмәсликини етирап қилған.

Бу мәркәзниң елан қилған доклатида йәнә, бейҗиңда олимпик баһанисидин башқа баһаниләр биләнму хәлқни өйлиридин мәҗбурий көчүрүш әһвали еғир болуп кәлмәктә " дәп көрситилгән. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.