خىتاي : پىلانلىق تۇغۇت سىياسىتىنى ئۆزگەرتمەيدۇ

خىتاينىڭ نوپۇس ۋە پىلانلىق تۇغۇت كومىتېتىنىڭ مۇدىرى جاڭ ۋېيچىڭ، خىتايدا ئۇزۇندىن بۇيان يولغا قويۇپ كېلىۋاتقان پىلانلىق تۇغۇت سىياسىتىنى ئۆزگەرتمەيدىغانلىقىنى بىلدۈردى. بۇنىڭدىن ئىلگىرى، خىتاي سىياسىي كېڭىشىنىڭ باياناتچىسى، مۇناسىۋەتلىك تارماقلارنىڭ ھازىرقى نوپۇس سىياسىتى ئۈستىدە تەڭشەش ئېلىپ بېرىۋاتقانلىقىنى ئېلان قىلغان ئىدى.

بىراق، پىلانلىق تۇغۇت كومىتېتىنىڭ مۇدىرى جاڭ ۋېيچىڭ، خىتاينىڭ پىلانلىق تۇغۇت سىياسىتىنىڭ غەرب مەتبۇئاتلىرى ئېيتقاندەك " بىر پەرزەنت كۆرۈش" سىياسىتى بولماستىن، بەلكى ھەرقايسى جايلارنىڭ ئوخشاش بولمىغان تەرەققىياتىغا ئاساسەن ئىجرا قىلىنىدىغانلىقىنى تەكىتلىدى.

ئۇ سۆزىدە يەنە،خىتايدىكى 19 ئۆلكىدە، بىر قىز پەرزەنت كۆرگەن ئائىلىلەرنىڭ يەنە بىر پەرزەنت كۆرۈشىگە رۇخسەت بېرىلىدىغانلىقىنى، يەنە باشقا 6 ئۆلكىدە 2 بالا ئېلىشقا بولىدىغانلىقىنى مەسىلەن، ئۇيغۇر ئاپتونوم رايونىدا 2 دىن 4 كىچە پەرزەنت كۆرۈشكە بولىدىغانلىقىنى، تىبەت ئاپتونوم رايونىدا بولسا تۇغۇت چەكلىمىسى يوق ئىكەنلىكىنى ئوتتۇرىغا قويدى.

پىلانلىق تۇغۇت كومىتېتىنىڭ مۇدىرى گەرچە، ئۇيغۇر ئاپتونوم رايونىدا 4 پەرزەنتلىك بولۇشقا يول قويۇلىدىغانلىقىنى بىلدۈرگەن بولسىمۇ، ئەمىليەتتە ئۇيغۇر ئېلىدە نۆۋەتتە 4 پەرزەنتلىك بولغان ئائىلىلەر يوق دىيەرلىك بولۇپ، ئىستانسىمىزنىڭ ئۇيغۇر ئىلىدىن ئىگىلىگەن مەلۇماتلىرىدىن ئاشكارىلىنىشىچە، شەھەرلەردە 2 دىن ئارتۇق پەرزەنت كۆرگۈچىلەر، يېزىلاردا بولسا 3 تىن ئارتۇق پەرزەنت كۆرگۈچىلەر ھەر خىل شەكىللەردە ئېلىپ بېرىلىدىغان ماددى ۋە مەنىۋى جەھەتلەردىكى جازالارغا تارتىلىدىكەن.

خىتاي ئاخبارات ۋاستىلىرى يېقىندا، ئۇيغۇر ئېلىدە ئاز پەرزەنت كۆرگەن، تۇغۇت چەكلەش ئوپىراتسىيىسى قىلدۇرغان ئائىلىلەرنىڭ 3000 يۈەن بىلەن مۇكاپاتلىغانلىقىنى ئاشكارىلىغان ئىدى. (ئەقىدە)‏