Zéng chingxung bilen nezerbayéw xitay - qazaq munaswetliri boyiche söhbet ötküzdi

Xitayning mu'awin dölet re'isi zéng chingxung seyshenbe küni qazaqistan prézidénti nezerbayéw bilen astanada körüshüp, qazaqistanning teywen, tibet we "üch xil küchler" ni basturush mesiliside xitayni qollighanliqigha rexmet éytti.

Zéng chingxungning eskertishiche, buning bedilige xitay qazaqistanning zémin pütünliki, musteqilliqi we milliy bixeterlikini qollaydiken. U, "xelq'ara we rayon weziyitide qandaq özgirish bolushidin qet'i nezer, xitay qazaqistanning yaxshi qoshnisi, semimi dosti we ishenchilik shériki bolidu" deydu. Qazaqistan xitayning shangxey hemkarliq teshkilatidiki yéqin shériki. Xitay da'iriliri sherqiy türkistan küchliri, siyasi köz qarishi oxshash bolmighan Uyghurlar we öktichi diniy zatlarni " üch xil küchler" dep atimaqta idi.

Xelq'ara kishilik hoquq teshkilatliri xitayni " térrorchiliqqa qarshi turushni bahane qilip, Uyghurlarning kishilik hoquqigha tajawuz qilmaqta" dep eyibligen. Zéng chingxung, qazaqistan prézidénti nursultan nezerbayéwning wezipe tapshuruwélish murasimigha qatnishish üchün düshenbe küni astanagha keldi. U, xitayning qazaqistan bilen shangxey guruhining ramkisi ichide bixeterlik hemkarliqini kücheytish arzusi barliqini bildürgen.

Shinxu'a axbarat agéntliqining eskertishiche, xitay - qazaqistan iqtisadi, soda we énirgiye hemkarliqidin qana'et hasil qilghanliqini bildürgen nezerbayéw, qazaqistan xitay bilen iqtisadi, soda, énirgiye, bixeterlik we medeniyet saheliride alaqisini kücheytishke teyyar, deydu. Xitay bilen qazaqistan otturisidiki atasu - alataw néfit turuba yolida ötken yili 12 - aydin tartip néfit éqishqa bashlighan. (Erkin)